区永权自爆3岁被生父虐待 头撞马桶爆血 首度公开悲惨童年 得奖自责冇多谢后父丨独家
区永权（Albert）第4度获提名“最佳男主持”终得奖，但他以为当晚只是“戥人高兴”，完全没准备谢词，结果遗漏了答谢已离世的爸爸，令他相当自责，因伴着他成长的爸爸其实是后父，而生父给他的印象只有家暴，3岁时曾被生父将他头塞入马桶令额头爆血，这段悲惨经历令他学识如何当个好爸爸。而得奖后，他最想有机会主持更多大骚，还希望挑战自己参加《中年好声音》。采访：杜杜 摄影：朱伟彦 服装:Harrison Wong
Albert 由2021年开始先后4次获提名《万千星辉颁奖典礼》的“最佳男主持”，去年已打入5强，他以为今年再入5强继续以旁观者身份戥人高兴，“事前啲仔有问我有冇机会攞，我仲斩钉截铁话‘唔会啦’！”正因冇预料得奖，事前没准备的他，对台上表现极不满意，“真系做得唔够好，我要检讨，做乜都好要有两手准备，我面部表情管理又好差，当时百感交集想喊都喊唔到。”
感激后父给完整家庭
由于当晚超时严重，Albert就长话短说，最终遗漏了多谢生命中很重要的人，“唯独唔记得多谢天上嘅爸爸，佢对我嚟讲好紧要，佢其实系我后父，虽然佢唔系我亲生爸爸，但系畀到我感觉系好锡我，好遗憾唔记得感谢佢，但我相信佢喺天上系知道！”畀机会Albert代替上台向爸爸公开道谢，“多谢你阿爸！多谢你畀到家庭维系嘅爱，我知你未必识点做阿爸，但系你令我识得点样去做个好爸爸，我会尽力去做，都想讲阿爸我得咗啦！”对于生父的记忆，他只有暴力，因生父有酗酒习惯，亦经常虐儿，最深刻一次发生在他3岁多，“我食橙骾亲，吐咗啲橙喺地下，佢见到就拉咗我入厕所，佢觉得要吐就吐落马桶，跟住将我个头塞落个马桶度，我好记得撞咗几吓，见到个马桶明明系白色变成红色，因为我已经额头爆咗，马桶染满晒血，但系佢唔当一回事，佢净系帮我揾块胶布黐住就算，我阿妈放工返到嚟梗系癫咗啦！”
悲惨童年学识当爸爸
由于生父家暴情况严重，Albert妈妈更曾报警求助，后来忍无可忍选择离开，“阿妈毅然带走咗我同阿哥，离开𠮶个家庭时我大概4岁，记忆好模糊。”之后他跟生父没有再见过面，“曾经有人问我好唔好同佢联络，但我真系冇呢个勇气。”Albert妈妈后来认识了后父再婚，令他能在完整家庭下成长，“可能我细个比较可爱，佢系几锡我，好庆幸遇到佢，所以上台攞奖时我讲咗阿妈我得咗，唔记得多谢阿爸系有遗憾，因为唔知有冇下次攞奖机会嘛！”这个家庭背景他不单从未公开，就连两个囝囝都是2年前才得知爷爷并非有血缘关系，“佢哋唔知道爷爷同我系唔同姓，知道时好愕然，我话畀佢哋听生父系点样，其实我都好少向身边人提起，可能由细玩大嘅朋友先知，因为我仲有个妹妹系唔同姓，或者唔系称呼我妈妈做区太。”他认为两个囝囝年纪渐大，是时候跟他们交代，“佢哋知我好锡佢哋，但唔知我系用悲惨童年换佢哋嘅快乐童年，我细个遇到呢啲经历，𠵱家做爸爸就唔希望喺我嘅家庭出现。”
曾志伟鼓励参加《中年》
讲到得奖后工作发展，Albert希望工作量增加外，亦想主持各个大骚。问到 2022年TVB台庆动用20个司仪，但他竟冇份一度成网上热讨，他也有思考过这问题，“𠮶刻系百感交集，点解有啲骚冇自己份呢？！但我结论系自己做得未够好，所以未有机会做住，相信如果做得好一定有人见到，咁咪再努力啲做好啲囉！”另外，他还希望参加《中年好声音》，更亲自问过总经理曾志伟意见，“我喺庆功宴问过曾生，我有冇机会参加《中年好声音》？！我估佢第1个反应系话‘畀多啲机会素人，公司同事唔好啦’，点知佢竟然话‘点解唔得呀？！去啦’。”1999年已凭组合“星盒子”身份在台湾出道的他，对唱歌热情一直没变，更希望借此挑战自己，“读书时参加过歌唱比赛后，都冇再参加，好想再试吓咁热血，比赛令肾上腺素同战斗力提升，好想试吓自己心脏系咪负荷到。”他唯一担心《东张西望》主持身份有角色冲突，“如果喺《东张》报道《中年》嘅消息时，我又系参赛者会有啲尴尬囉！”
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
