【曾智华专栏】民意大白象

乜叫民意？正是大部分市民的意愿。乜叫大白象，即大大只在眼前，盲嘅都睇到的一切呀！最近有两条公众议题，就正正是“民意大白象”了，可惜一众高官唔知真定假睇唔到，决定选择逆民意而行，于是乎令人为之吹胀。

第一宗正是搞到身水身汗，咨询又咨询，米都早煲成饭，但仍未郁手的……将网约车纳入管制，正正式式定立法例，公开接受申请再发牌。其实，难怪近年中央领导人直接间接不停表示对香港发展非常肉紧——喂，点解咁多瓣唔掂㗎，有冇搞错呀？

网约车在全球大城市，尤其内地，早已上晒轨道。香港要搞，有N咁多参考范例，根本绝无不能解决的关卡，难明为乜拖呀拖，拖到班的士商最近又再有借口发烂渣。

终于，又要整色整水话“我有执法㗎”，随便拉几架网约私家车做场戏。相信他日上到法庭，也会畀个官省一大顿，然后轻判放人。政府究竟几时可以搞掂第一只民意大白象呢？

第二只，当然是被全港八岁到八十岁嘲笑的“为求更好效果所以唔直播”的启德体育园开幕典礼。凡有少少传媒直播经验者，都会笑到喷饭，咁都讲得出？香港几时倒退到要录播才有好效果咁“小学鸡水平”呀？真难为班出嚟为政府决定死顶的忠贞建制门外汉。

凡大型重要活动必定直播，早已在半世纪前成为惯例，无论美国总统宣誓、人大会议开幕、北京奥运开幕、中英移交香港仪式、金像奖颁奖典礼……边次唔系直播？有冇人儍到话必须录播才会“效果更好”咁低层次㗎？

呢只民意大白象，根本完全毋须出现，纯粹自我制造“笑位”畀人入，太不智。

仲有几日，会唔会有可能“拨乱反正”呢？