【曾智华专栏】几时做庄，几时做闲

今个星期开始，本版耳目一新，设计Sharping靓仔，颜色鲜艳夺目，设计师应记一功，唔该汤老总请佢饮茶。

睇睇有乜新人登场先。咦，星期一本栏隔篱乃美丽又能干的许芷恩（Helena），睇吓写乜？真真一矢中的，拔剑直指中央。

讲的正是艺人行走江湖大忌——庄闲不分，应做闲时，走去争做庄，完全唔识Do，当然搞到全世界嬲你唔知，话你唔好意思。

Helena指出的，正是早前《格林美音乐奖》颁奖典礼中，有人“抢嘢”（刻意抢焦点），令人神共愤。当晚美国饶舌天王Kanye West带同太太Bianca Censori出席，身份只属参与嘉宾，理应行完红地毯，就乖乖坐低睇骚，因当晚佢俩只做闲，并非主角人物。点知Bianca突然“抢嘢”，将身上皮草剥下，变三点毕露。

呢下，当然引动全场记者乜都唔影，只仆去影佢，而翌日也只将大会奖项放二条，改将剥光猪卖大包的Bianca放大抢读者。好啦，抢嘢成唔成功？成功。但人缘呢？人格呢？品行呢？专业呢？自己一铺清袋。

小弟初出茅庐时，与薛家燕姐姐倾偈求教，佢乃长青树兼著名好人缘，娱乐圈中的成功典范。点解真成功（并非Bianca那种）？一个秘诀——应做庄时做庄，应做闲时做闲。

意即当你做主角时，必须专业，操好才出场，令自己光芒四射。但做闲时，就要为主角鼓掌，乖乖在台下默默支持，切忌“抢嘢”。

走笔至此，刚刚在娱乐版读到阿Sa与容祖儿参加卫诗雅婚宴，当然畀记者捉住影相兼“唔该讲两句”，佢俩非常识做，几大唔讲，一影完相就闪入场，因当晚两人做闲也。