【曾智华专栏】《欢乐今宵》五大万能老倌

上世纪七十、八十年代家传户晓的艺人俞明，十分有福气，上周睡梦中静静离世，享年一百岁，儿孙满堂，作为一个人，真的算是成功典范。

小弟在人生交叉点中，亦有幸遇上俞明叔，时为1978年，正值《欢乐今宵》（《EYT》）仍是大盛日子，遇上当年丽的电视也进入黄金期，麦当雄、萧若元、徐小明个个有脑又烂打烂砌，誓要将TVB霸主地位连根拔起，事实，丽的推出的《天蚕变》、《天龙诀》及《大地恩情》，真系套套攞命。

更犀利，精于排阵策略，睇死《EYT》晚晚铺铺清，观众毋须追看，于是，就用最强的剧集打《欢乐今宵》，望“断你龙骨”。

当然，无线做得广播界盟主，地位岂会轻易被动摇？于是调动大量台前幕后精英，晚晚开战。

适逢其时，我加入《EYT》做小薯仔助理编导，初出茅庐有机会参与电视世纪大战，无限兴奋，晚晚唔瞓又点话，有仗打，当然士气高昂。

助导，即大杂工，乜都要一脚踢，由执头执尾到Casting都孭晒。其实后者好大影响力，因艺员不能决定自己做乜角色，等派，而负责派的，正是每日当值的助理编导。若果立心不良，可以正嘅畀晒阿A，猪头骨就安排阿B啃。

我又如何？只一心谂住边个做边个角色效果最好，但当然也被误会大细超。

其时《EYT》有五大万能老倌，即系你派乜畀佢，或正或邪，或正经或搞笑，佢都一定交到货。边五位？正是：卢海鹏、谭炳文、俞明、吴孟达及罗浩楷。

当中尤以卢海鹏最劲，真正演技派出身，下午畀角色佢，即会自己走去揾化妆、服装倾，点扮嘢会有最大效果，再唔声唔声慢慢上身。

就此，扮的几个“经典角色”，全部可以传世。