【曾智华专栏】M记咁搞，你点处理？

今日标题的M记，并非麦当劳汉堡包，而是何文田广场数一数二的大集团超市。

长辈教落——得饶人处且饶人。对，我经常执行。但另一方面，政府又日日夜夜宣传——今时今日咁嘅服务态度，唔得㗎喇！香港乃一个国际城市，游客众多，若搞不好服务质素，一路向下沉的话，请问对边个有好处？

小弟态度，若遇上小本经营，尤其街边一类食肆，质素唔掂，算数，嗗声吞咗佢，帮衬第二间可也。

但若是代表香港品牌又唔同，若服务太差太离谱，为本城整体大利益，点都应该发句声。

两个月前在本栏讲述的国泰航班经验，正因被困候机室、机舱、入境处等候区十一小时，国泰完全不提供任何食物，饿到二百几名乘客MM声呱呱嘈，我作为其中之一，也庆幸冇饿晕，于是公开投诉。其实除为一众乘客申冤外，亦希望国泰尽快改善“饿晕人”政策。

终于两星期后有回音，承诺改善，且看日后又如何了。国泰航空乃香港人“骄傲品牌”呀！

讲返何文田M记，就在住处附近，故不时帮衬，多安排送货。碰啱去年尾有七十人团年饭，于是决定在M记买酒送到宴会场地。先问问经理得唔得？答曰：“曾先生，十日内，因越区。”

冇问题，预早十一日订，畀晒钱。

终于，弊家伙，到第十日影都冇。摆酒冇酒，成何体统？

第十一日早上再亲身到M记追，又答曰：“放心，今日内送到。”

结果？唉……真系踢晒脚，再变“冇影行动”，乜承诺嘅服务可以变冇尾飞陀？怎不火都嚟。不过揿住，先谂点收科。

无奈，只好扑又扑再买够当晚用的酒，然后安排车去宴会现场，身水身汗自己搬。

搞完，面对M记咁搞法咁服务，点处理？