【曾智华专栏】“直线力山”初三开运

大年初三，恭喜发财！

本来近年已甚少“俗气”恭喜人发财，改为“新年快乐”及“身体健康”，但面对一众马迷，到底“捐”咗咁多做善事，新正头第一击，发吓财亦人心所欲也。

余下赛事，已冇咗潘顿破纪录的焦点，应改而睇睇边个做冠军练马师了。

我当然捧华人。睇斗志，沈集成简直有冲天烈燄，肯定死咬唔放，去硬马。

伍鹏志又如何？马虽多，但高质素的略略久缺，且旗下马不停跑，只怕入到直路开始脚软，不过，三甲不能唔预佢！

姚本辉就快退休，阿仔接硬棒（副练之中，似乎冇乜对手。因马会选人，讲能力，也讲外形，姚仔赢晒），所以，未必退休前将马炼尽。不过，辉哥实力仍是华人数一数二。

至于上届冠军吕健威又如何？会否又重复来一次临尾杀上短头胜出？绝对有机会，因以上四位之中，论谋略，佢胜一筹，兼且手上子弹也不少，随时有需要就揭竿而起。

至于人人话有机会爆上的巫伟杰，我睇今季未得嘞，等多两季，再成熟啲先啦！

今日有场三级赛，跑千八米。

我睇好姚厩的“直线力山”。呢匹马曾经在方仔处两季，胜出两场级制赛，以长途为主。去到去年年头攀到一一七分，开始能力止步，结果今季拉仓。

呢类六岁马，若姚本辉冇一定信心，应该唔会收。收得，必寻求交代。

转仓后，先跑两场不合脚法的千六米二级赛，当然输。上仗改跑一级赛二千米，独赢赔率六十二倍，根本无心去马。

不过，今次唔同，改跑三级，实力大增。若然赔率十倍以内，老友，祝大家年初三开运喇！