【曾智华专栏】个选举真定假㗎？

各大传媒为造势，也增自己江湖地位，不时都会搞这样那样的比赛及选举。

小弟在此行五十年，最少被人问过三千次：“喂，碌Sir，乜乜比赛、物物选举，结果系咪内定㗎？有乜理由咁咁咁㗎？又话尊重民意，又话一人一票？”

写此稿时，正正见到TVB总经理曾志伟录影贺年节目时，被记者围住问视后、视帝选举是否绝对公平公正？是否若艺员唔肯续约就冇分……

呢啲问题，小弟睇见已觉好笑，可能班年轻记者“新嚟”，真系唔知。又或者明知故问，想逼志伟埋墙角，睇佢会否Slip of Tongue穿崩。

老友，志伟系乜嘢人呀？佢二、三十年前做电影公司老板及当红巨星时，班记者仔可能仍然未喺胚胎，所以，唔畀佢带你游花园点到陀陀拧就奇啦。

难道你想志伟话：“系呀，你睇吓炎明熹咪知囉！”真系儍儍哋嘅。

讲返小弟经验，当年香港电台与商台打生打死，争取影响力，争取收听率。其中一项显示实力方法，就是捧人。TVB当然最犀利，捧边个红边个。捧，当然捧自己亲生仔女，难道捧亚洲电视小生、花旦？儍的吗？另外，当然捧签长约的艺员，喂，你下个月就跳槽，仲捧你？有冇幼稚园常识㗎。

同理，港台、商台也是只捧自己人，正常。港台当然狂捧《青春交响曲》年轻偶像，而商台则谷尽《六啤半》，此乃最基本公司政策，唔识请借歪！

所有传媒管理人，若不懂为公司最大最终利益落决策，立即行开！乜叫公司最高最大利益？此乃常识，若仍要问，就似乎在侮辱大家智慧。所以，当你今年见到无记“封”边个做视帝、视后时，已是一个重要讯号，此乃非常精确计算出嚟。