【曾智華專欄】個選舉真定假㗎？

各大傳媒為造勢，也增自己江湖地位，不時都會搞這樣那樣的比賽及選舉。

小弟在此行五十年，最少被人問過三千次：「喂，碌Sir，乜乜比賽、物物選舉，結果係咪內定㗎？有乜理由咁咁咁㗎？又話尊重民意，又話一人一票？」

寫此稿時，正正見到TVB總經理曾志偉錄影賀年節目時，被記者圍住問視后、視帝選舉是否絕對公平公正？是否若藝員唔肯續約就冇分……

呢啲問題，小弟睇見已覺好笑，可能班年輕記者「新嚟」，真係唔知。又或者明知故問，想逼志偉埋牆角，睇佢會否Slip of Tongue穿崩。

老友，志偉係乜嘢人呀？佢二、三十年前做電影公司老闆及當紅巨星時，班記者仔可能仍然未喺胚胎，所以，唔畀佢帶你遊花園點到陀陀擰就奇啦。

難道你想志偉話：「係呀，你睇吓炎明熹咪知囉！」真係儍儍哋嘅。

講返小弟經驗，當年香港電台與商台打生打死，爭取影響力，爭取收聽率。其中一項顯示實力方法，就是捧人。TVB當然最犀利，捧邊個紅邊個。捧，當然捧自己親生仔女，難道捧亞洲電視小生、花旦？儍的嗎？另外，當然捧簽長約的藝員，喂，你下個月就跳槽，仲捧你？有冇幼稚園常識㗎。

同理，港台、商台也是只捧自己人，正常。港台當然狂捧《青春交響曲》年輕偶像，而商台則谷盡《六啤半》，此乃最基本公司政策，唔識請借歪！

所有傳媒管理人，若不懂為公司最大最終利益落決策，立即行開！乜叫公司最高最大利益？此乃常識，若仍要問，就似乎在侮辱大家智慧。所以，當你今年見到無記「封」邊個做視帝、視后時，已是一個重要訊號，此乃非常精確計算出嚟。