【曾智华专栏】“泰泰精神”赢得

真真反高潮！本来以为上周日“软硬鞭”会在澳洲帮兄弟及本地演艺巨星拱照下，完成壮举，破韦达纪录的，结果……好似畀麦道朗呢只拦路虎搞㖞。

潘顿摆明斗志如虹，刻意唔场场跑，保留体力，只跑有机会的场次。

第五场骑“劲先生”，已见其决心，排十四档，非常精准留放，最终由后杀上赢短头，极度精彩，可作赛马教材。

之后，“嘉应高升”更是赢到晨操咁款返嚟，收缰大胜三个几马位，呢场W竟然派11.5元，有点好分到“唔合理”呀。

不过，跟住惨况出现，正是第七场骑“光年魅力”，一条直路畀乡里麦道朗只“骏奕快车”封死，最后一百米，好少见潘顿会咁心急，搏命想撬开“骏奕快车”，奈何老麦一步不让死顶，搞到最后潘顿要将马抽起，蚀位无数，再用奶力冲时，已失先机。

呢场两显示：一、潘顿与麦道朗，是否“上场无父子”，抑或是根本互相唔顺对方？要揾答案；二、“光年魅力”摆明超班，必定失之东隅，收之桑榆，存记。

至今潘顿仍差两场才破纪录，又系嘞，佢每场赔率皆必缩水，因不少人会夹叠买佢破纪录。究竟值唔值咁玩法？各自执生。

小弟方式，每场二重彩复式，选五只，一定会拖埋佢，以免被拒笃爆。至于W，就要睇睇值唔值得博喇。佢今晚骑七只，边只最高机会？

“泰泰精神”肯定最高机会，因上场初段冇决心，但入直路后，只马以凌厉斗心自动波冲上，只是被外档马封晒位输少少。今晚只要潘顿唔好出“软鞭”就W得。

另一只要𥄫实为“唯美主义”，两次1650米跑近，今次增程至千八米，骑练皆必有其见地。

估计今晚老潘又会不停打钟仔喇。