【曾智华专栏】马迷的“丧钟”

错就认，周三赛事，小弟跌晒眼镜，以为告东尼出十只，理应大举出击，尤其一月杯摆强阵，点知，唉……输到挞皮，只得一只“当年情”入第三，最离晒大谱为“软硬鞭”潘顿只“泷泽飞驹”，二点九倍全热门，竟够胆死跑第尾，输十二个半马位！

马会为捧潘顿，谷佢破纪录，刻意整咗个钟在马场，凡赢佢就敲一下。这个钟，一个唔觉意，变为不少马迷的“丧钟”，因不少人以为老潘为提早破纪录，会应搏尽搏。

哈哈，点知佢正正可能利用呢种群众心理，倒转玩，周三就表演两只跑包尾畀你睇，犀利。

不过，马圈是个多姿多彩世界，有“整蛊专家”，同时又有令人可喜的“龙穿凤”现状。

小弟讲的，当然是长期冇乜马骑兼发霉的骑师巫显东，突然发威，在昔日师傅沈集成关照之下，连赢两日。

第四场“荷花之星”，更赢得有板有眼，入直路带离，爆出六十五倍巨冷。

骑师也是表演事业，出场时要讲信心，长期输当然唔掂，会成个谢晒怯晒。信心十足则不同，斗留放，斗末段，可以同你死过。

沈集成今年明刀明枪争冠军，不少马谷到火红火绿，而佢又爆仓，希望多点关照巫显东，扶助有心发愤的弱家。

其他练马师，尤其华人的，也望帮帮手，畀多啲机会巫仔上阵。

明天赛事，最有研究价值为第七场，因十二匹马中，有五匹上场胜出，包括：“包装天将”、“舞林密码”、“开心宝宝”、“飞轮步”及“玩笑”。我就飞晒佢哋，改买三只，分别为“竞骏辉煌”、“亚机拉”及“球星”，Q、PQ及二重彩。若揾胆就用“球星”啦，此程有保证，档又好，睇希斯明天个阵，真系唔嘢少㗎老友。