【曾智华专栏】“狂特”会郁联汇？

近日去到边都有人问：“碌Sir，特朗普上场，一定同中国全方位开波，外交军事经济必定瓣瓣齐来，到时会否搞散香港联系汇率？”

小弟并非专家，从来睇事物，皆只用常识（Common Sense）判断。事实，不少历史上的智者，早已指出人类大部分问题，只要懂得常理思考，已可解决。

联系汇率的创立，与美国意愿无关，纯是香港钩住佢，毋须佢同意。香港早早拥有几万亿美元储备，刚好与发行的港元同值。

边个想沽港元？小的，无谓提。大的，去到十亿八亿元，也冇问题，金管局立时用美金兑换，影响轻微。

好嘞，若有任何大势力，想撼散联汇，可以点做？一嘢沽出几百亿至几千亿港元囉。

但边个有咁多港元？理论上，只有“借”一途。咁问边个借？几千亿元㖞！

又系常识，如此巨额港元，只得发钞银行，即汇丰、渣打及中银会有。但佢哋会提供火药畀你去玩死港元联汇吗？唔该用吓个脑。再者，政府又会否袖手旁观，任你班大鳄玩？当然冇咁嘅事。首先，边间银行借钱畀大户郁港元边间死，分分钟牌都钉埋，再罚天文数字巨款。

另一招，以前打大鳄用过，边个借港元沽空，即时会欠到周身“港元债”，好，咁金管局就一二三在一日内狂加息，即刻夹瓜你，睇睇边个手瓜硬。客观形势，根本冇得玩。

更重要，美国最惊乜？惊美元霸权不再，冇人用，个个转用欧罗、人民币等。如此，完全乱印出来的美元即会“阴司纸”化。正正因此，狂特才会早前高调警告金砖国咪搞自己钱币，否则开战。

总结，美国肯定不愿见到港元不再钩美元，因搞残港元联汇，等于拿起石头撼自己的脚，有冇咁猪头？