【曾智華專欄】「狂特」會郁聯匯？

近日去到邊都有人問：「碌Sir，特朗普上場，一定同中國全方位開波，外交軍事經濟必定瓣瓣齊來，到時會否搞散香港聯繫匯率？」

小弟並非專家，從來睇事物，皆只用常識（Common Sense）判斷。事實，不少歷史上的智者，早已指出人類大部分問題，只要懂得常理思考，已可解決。

聯繫匯率的創立，與美國意願無關，純是香港鈎住佢，毋須佢同意。香港早早擁有幾萬億美元儲備，剛好與發行的港元同值。

邊個想沽港元？小的，無謂提。大的，去到十億八億元，也冇問題，金管局立時用美金兌換，影響輕微。

好嘞，若有任何大勢力，想撼散聯匯，可以點做？一嘢沽出幾百億至幾千億港元囉。

但邊個有咁多港元？理論上，只有「借」一途。咁問邊個借？幾千億元喎！

又係常識，如此巨額港元，只得發鈔銀行，即滙豐、渣打及中銀會有。但佢哋會提供火藥畀你去玩死港元聯匯嗎？唔該用吓個腦。再者，政府又會否袖手旁觀，任你班大鱷玩？當然冇咁嘅事。首先，邊間銀行借錢畀大戶郁港元邊間死，分分鐘牌都釘埋，再罰天文數字巨款。

另一招，以前打大鱷用過，邊個借港元沽空，即時會欠到周身「港元債」，好，咁金管局就一二三在一日內狂加息，即刻夾瓜你，睇睇邊個手瓜硬。客觀形勢，根本冇得玩。

更重要，美國最驚乜？驚美元霸權不再，冇人用，個個轉用歐羅、人民幣等。如此，完全亂印出來的美元即會「陰司紙」化。正正因此，狂特才會早前高調警告金磚國咪搞自己錢幣，否則開戰。

總結，美國肯定不願見到港元不再鈎美元，因搞殘港元聯匯，等於拿起石頭撼自己的腳，有冇咁豬頭？