【曾智华专栏】冇钱畀？唔拗！

朋友之中，颇多有趣又幽默之人，其中一位乃香港著名“金牌大状”K爷。

此君打案非常犀利，经常可以令被告甩身，所用方法千奇百怪，其中一种为查吓个官的升迁与放假安排。即系乜？即系假若个官已被通知升职或调职，通常之前会放一段大假，所以，会一百个不愿意因一单案而影响佢整个旅游大计。

若K爷知道，就一于有理无理行使权利，将案拖延嚟打，希望法官大人心急，想速速完结而作出有利被告的判决。老友，唔好笑，法官也是人，一样有七情六欲、暗中自私并怕老婆哦……之类㗎。

另外，平时聚会，无论在座老友几兴奋或酒酣耳热拗嘢，K爷一概只阴阴嘴笑，眼仔精灵四围碌而不发言。

某次我好奇问佢为何乜都冇意见，又乜都唔插嘴，与佢上庭时雄辩滔滔判若两人？佢如常微微笑，成个英国古惑绅士款回应：“I never argue without pay, that's my principle.”

“冇钱就唔拗嘢？咁你返屋企，有冇同老婆顶嘴，铺铺哑忍？”

“碌Sir，原则一样。我不是冇意见，其实对事事皆有意见，但一谂到自己打堂案以十万元计，立即收口，哗，一讲，其实好似将银纸喷出咁肉赤㗎，哈哈哈。同老婆大人一样，老老实实，佢凡闹我，十之九九乃情绪高涨乱嚟，驳赢容乜易，不过，赢咗口舌即系输咗感情，无谓。此时，自己安慰自己，与老婆大人打官司，不单赢咗冇钱收，兼且会反面，几大都唔好制啦吓嘛，有冇咁蠢呀？”

K爷为人精灵又聪明，任何饭局老友辩论，我皆只见佢在脑内拆局判断谁是谁非，但永不出口，或许也是人缘好的一项绝技。