【曾智华专栏】咪以为自己好鬼Fit

与不同圈子老友定时聚会，其中之一Sing Along小组，每隔半年晚饭。今次一见平时大大只Fit到爆的肌肉先生“劲S”，突然少少缩咗水，身材明显有变，当然立即问候。

“唉，碌Sir，个个见到我都问，讲咗N次都仲系要讲，正是早前几乎瓜得囉，唉……”佢摆出个苦情样。

原来三个月前某晚，佢惯性又去跑黄昏步时，突然心口𢲡住痛，于是立即停低坐下，唞一唞，结果几分钟后冇事。“劲S”谂，自己日日操，周身肌肉，人人羡慕，点会有事？于是冇理，继续正常生活。

点知两日后早上孭背囊返工，落到楼下，又来，先个心又𢲡住，继而四肢冇力，行路也有问题，立即揾家人求救。

阿仔飞扑落楼下见父亲卧在地上，面青口唇白，知道大件事，两个选择，一系叫白车，另一，因“劲S”早几年买咗医疗保险，有得赔，当下决定去“养和”。

冲入急症室，医生、护士一睇已知大件事，立即安排全身详细检查，一照就知，原来心脏三条血管塞晒，犀利过繁忙时间海底隧道，血液无法流通。点搞？当然火速“通波仔”，救条命仔大过天！

事后身体当然大不如前，更要服用心脏药、薄血药、胆固醇药……无法，年纪也不轻了，决定退休。

小弟好奇一问：“S哥，你六十岁前乜都冇验嘅咩？照计你情况，以今天科技，定期验血就知有几高危㖞，从冇验身？”

“冇呀，我觉得自己鬼死咁Fit，肌肉扎实，晚晚长跑，冇病冇痛，使乜验㖞？”

不少老友正是如此，完全唔知自己血压高、胆固醇爆晒表，因冇乜特别感觉嘅，但累积到咁上下，一出事，分分钟返唔到转头。我右眼早年中风，正是如此，验少次都出事！