【曾智华专栏】请畀条生路《爸爸》

《爸爸》今日上画，真真令人担心。

担心乜？因过去几星期，香港戏院界出现一个令人非常无奈现象——一片功成万片枯。

即系一套《破．地狱》超级狂收，自然在商言商，院商将一切场次尽畀《破．地狱》，其他全部靠边站。就算几有诚意及几认真的制作，甚至可能也有票房潜质的，皆冇运行。

最弊见到早前有些院线，全院由日到夜，半套都唔畀机会其他片，现象极度不健康。

今日又有套高质素电影要上了，正是《第21届香港亚洲电影节》的闭幕电影《爸爸》。

执笔时翻开各大院线点排《爸爸》，哎吔吔，都咪话唔惨情，例如又一城院线，只有三场，而《破．地狱》则仍然有五场。

荷里活戏院更离晒大谱，一场都冇！而《破．地狱》放二十场。大佬呀，使唔使咁玩法？畀条生路行吓都得啩？唉……

小弟上周因想尽绵力支持诚意本土制作，包场组织七十几位老友，到高先戏院睇《爸爸》，之后邀得导演翁子光、女主角谷祖琳及饰演女儿的熊诺颐作现场分享。

肯定此片又将再为刘青云带来下届金像奖提名机会，佢演技永远有种内敛爆炸力，忍住忍住，但观众就是感受到佢心中的火燄。

“导演，你选男主角，有冇考虑其他人选呢？”

“冇！因青云不单演技好，而我哋做过调查，佢特别受女性观众欢迎！”翁子光解释。

刘青云受家庭妇女欢迎，因佢有种安全感Feel，形象又够草根亲民，兼且太太郭蔼明也极有观众缘，两人就似与香港人是一家。

《爸爸》不是商业电影，但极好看，尤其当你家人或朋友中有严重情绪病患者，更会边睇边沉思。