【曾智华专栏】竞赛小组怎能服众？

上周日赛事，本以为大赛前夕，戏码平淡，个个先放软手脚，一心迎接下周高潮来临。

点知唔系，突然杀出个“何泽尧日”，竟然横扫三W三Q一P，震惊四座，几乎冇佢冇钱收，点解会咁？你问我，我问边个？总之就是“今天你，当主角……”，其他骑师缩剩一个“哈咾文”布文，佢当日突似食咗药，本来沉咗成个月，人人以为佢变废柴，但突然废柴又会马神上身，连扫三W，一系唔出手，一出手就W，犀利。

另一令资深马迷及马评人弹起的事件，为当日竞赛小组的决定，离晒大谱。

老友H乃数十年马迷兼马评人，非常㷫，不过，今天在香港评马，多多少少都要忌马会三分，费事得罪最大势力，不过，佢有个“胆正命平”老友，即系我：“碌Sir，我哋仲要靠写马揾食，不能太过坦白，你唔同，一定要执行正义啊。”

哗，乜讲到咁大呀？原因是上周日法国新星贝知仁上场，一亮相，头场即施展快放功架，在五班1650米泥地赛事，将所有马放到甩晒辘，骑大热“天时明驹”的“软硬鞭”吓到甩肺，惟有沿途死追，终于临冲线才将贝知仁的“精明选择”以短码头啄赢，一额汗。

但公众马迷，包括小弟在内，无不拍晒手掌，觉得呢丁法国仔非常有料到。事实，佢骑第二场的“黑白”，也显出不凡功架及劲度，一条直路逢马过马，犀利无比。不过，咁正表演，竞赛小组竟话佢第一场放得过快，给予告诫，真不知准则何来。

看台公论，竞赛董事黐黐哋，过快？你问吓潘顿吖，几乎死畀佢睇呀！

今晚跑“国际骑师锦标赛”，精彩到震。唔愿都要，仍应是地头虫“软硬鞭”潘顿夺标机会较高，因佢乃快活谷跑道专家，出硬鞭的话，高一皮㗎。