【曾智华专栏】国泰饿到我几乎晕低

睇新闻乃我日日的习惯，但成为新闻中人物，就真系咪搞。点解？因新闻铁律——Bad News Sells。

你出现新闻当中，十之八九衰嘢也。又中！

今日大家睇见标题，可能问：“喂，碌Sir，使唔使咁火焫焫呀？”但若你是二百个被虐待的苦主其中一个，满肚火无处喷时，可能会更焫。

昨天讲到周一坐CX 630由泰国曼谷返港，结果遇上服务大灾难。二百个经济位乘客（商务客我唔知）十二小时冇半点米落肚，连方便面或饼仔都冇，未有人饿到休克或晕低，算国泰好彩了。整件事，昨日本栏只记录到晚上十点半，即人人由四点在候机室开始，至困机舱到十点半，仍得不到任何顶肚支援，只无望地等等等。

十分钟后，机长正式宣布，无法修理妥善，决定唔飞，乘客落机安排到酒店。

你以为苦难至此，可出机场揾食？发梦冇咁早！仍然全部不准离座，坐定定，等一批又一批办手续重新入境。本来呢类机械操作式过程，可以飞快搞掂的，但顶佢头球，搞到个个想讲粗口，咁简单嘢都玩足三个几钟才全部落机，此时已是凌晨一点半！

再讲一次，至此仍冇半粒食物提供，国泰当个个“神仙肚”？最冇瘾，机上服务员的工作间，却传来阵阵香味，即有人有嘢食。小弟冇抗议，因佢哋都系人，但多口一问：“明明机上有二百份餐，为乜唔畀乘客？”答曰：“对唔住，公司政策！”相信最好脾气者都会火山爆发！

结果由落机到出境再上旅游巴，全部安排一片混乱，毫无章法，大佬，一间代表香港的品牌，服务使唔使搞到咁垃圾呀？

终于凌晨三点半，我才食到啖自己买的芒果糯米饭。