【曾智华专栏】点解泰国咁吸引

久违了泰国，终于在肥女B提议下，又去一次八年未到过的曼谷。

点解咁耐冇去？因印象麻麻，最攞命热到癫，更甚，处处塞车塞到儍。

老友，我嚟度假，嚟Relax，唔系嚟分分钟被逼焗桑拿及在街上食死气㖞。加上凡搭的士就心惊胆颤，因唔知塞几耐，除冇得去洗手间外，就是睇住个收费表一下一下无止境咁跳，感觉非常差劣。

但肥女B在游说为父过程中，大派定心丸：“肥爸，11月底去，唔会好热㗎！另外，如今处处用网约车，预约时定几钱，唔使睇表，车种又靓又干净，使乜坐的士啊？塞车处处都系，但预咗，睇住手机知塞几耐，唔太离谱㗎！”

肥女B诚意十足，盛情难却，去就去啦！

踏出曼谷机场，仍然一贯人头涌涌，各国游客有齐，人人开开心心，内地人及金发欧洲客触目皆是，总之就是有种嘉年华气氛。

肥女B安排好一切，网约丰田旅行车，大半小时到酒店，Good Choice，在民居中竟然有间仿似布吉岛沙滩旁的度假酒店，名U Sathorn Bangkok，只三层，全部房间围着泳池而建，间间有露台，最底一层踏出房即可游水。

房间WiFi不用密码，任用。电视有齐各国新闻台，冇人禁呢个𠮶个，睇乜都得。

漫步泳池旁，过瘾，肯定泰国独有特色，即系各类斯斯文文“鸳鸯”不少，静静地晒太阳谈天，包括男男、女女、男女、老青、青老……恋人无界限，来到泰国就可打破本国一切禁忌。

大量欧洲客远道飞来，不会无缘无故，正因此处有欧洲欠缺的阳光、海滩，以及一种自由奔放做“乜都得”的魅力。

加上消费仅西方（及香港）一半以下，难怪班班机都爆，趁墟咁涌到，大有其因也。