【曾智華專欄】點解泰國咁吸引

久違了泰國，終於在肥女B提議下，又去一次八年未到過的曼谷。

點解咁耐冇去？因印象麻麻，最攞命熱到癲，更甚，處處塞車塞到儍。

老友，我嚟度假，嚟Relax，唔係嚟分分鐘被逼焗桑拿及在街上食死氣喎。加上凡搭的士就心驚膽顫，因唔知塞幾耐，除冇得去洗手間外，就是睇住個收費錶一下一下無止境咁跳，感覺非常差劣。

但肥女B在游說為父過程中，大派定心丸：「肥爸，11月底去，唔會好熱㗎！另外，如今處處用網約車，預約時定幾錢，唔使睇錶，車種又靚又乾淨，使乜坐的士啊？塞車處處都係，但預咗，睇住手機知塞幾耐，唔太離譜㗎！」

肥女B誠意十足，盛情難卻，去就去啦！

踏出曼谷機場，仍然一貫人頭湧湧，各國遊客有齊，人人開開心心，內地人及金髮歐洲客觸目皆是，總之就是有種嘉年華氣氛。

肥女B安排好一切，網約豐田旅行車，大半小時到酒店，Good Choice，在民居中竟然有間仿似布吉島沙灘旁的度假酒店，名U Sathorn Bangkok，只三層，全部房間圍着泳池而建，間間有露台，最底一層踏出房即可游水。

房間WiFi不用密碼，任用。電視有齊各國新聞台，冇人禁呢個嗰個，睇乜都得。

漫步泳池旁，過癮，肯定泰國獨有特色，即係各類斯斯文文「鴛鴦」不少，靜靜地曬太陽談天，包括男男、女女、男女、老青、青老……戀人無界限，來到泰國就可打破本國一切禁忌。

大量歐洲客遠道飛來，不會無緣無故，正因此處有歐洲欠缺的陽光、海灘，以及一種自由奔放做「乜都得」的魅力。

加上消費僅西方（及香港）一半以下，難怪班班機都爆，趁墟咁湧到，大有其因也。