【曾智华专栏】电子现金券的诱惑

商业机构为吸引兼勾住你消费，绞尽脑汁创造N种花样，目标就是针对人性的贪。正是唔怕你精、唔怕你呆，最怕你唔贪又唔来，冇晒返头帮衬肥水鱼，点掂？

近两年最盛行的，正是电子现金券，最揾老衬是并非真现金，而是电子券，条件多多，你必须帮衬几多几多钱，甚或指定买乜才可用。唔用？可能几日内报废，令你觉得蚀底。

呢招肯定好掂，故此，各大地产集团旗下商场，全部火速执行，所有零售集团又用，两大超市更加用用用！

好笑在以上集团收银，多为师奶级阿姐，佢哋真诚地非常肉紧又好心，凡见我找数冇用或未用现金券，必定火速提点：“哎吔，先生，你有XX张现金券未用呀，就快过期㗎喇。”

有次过瘾，小弟答：“个户口唔系我㗎，系老婆大人㗎！”

阿姐冇理后面等紧畀钱人龙，大大声指示：“咁你快啲返屋企通知老婆啦，否则……”

另外近日手机不停弹出N种各类电子消费券讯息，简直“走避不及”！点解佢哋知我电话及电邮？简单，因个个商场皆如是，唔入会冇消费优惠泊车，你点会唔入？一入就自动交出所有联络方式。

昨日晚饭，又有单过瘾嘢。老友“精明R”刚刚去完欧洲邮轮Tour，眉飞色舞形容处处几鬼靓。讲讲吓，佢话：“哈，唔知点解，有日架船突然话零件坏咗要换，延迟咗两小时，之后几慷慨呀，人人回水两百美元呀！”我一听：“哗，好大只蛤乸啫，边间公司？结果，你两百美元点使咗佢呢？”

“唔可以四围用㗎，畀嘅系电子现金券，只限我地明年若再报团时，先可以用㗎！”小弟立即小人之心上身，应咪又系……