【曾智华专栏】曾先生，有电话揾你

马圈除咗马之外，亦有不少花絮令人发生兴趣，尤其涉及名人。

例如早前郭富城爱驹“舞林密码”出赛，城城就大棚人（太太、经理人及老友）入场，发生小插曲，就是城城虽然贵为天王，又是马主，但竟被拒进入快活谷亮相圈范围。点解？因城城当晚只穿咗一件Polo恤而冇着西装。

正是家有家规，马会职员若因佢是明星而用另一个标准处事，当然是自己失职，同时也累埋郭富城，因必定被指：“歌星系咪大晒先？”

马会乃一个“私人会所”，故此，不少规条要求所有会员及马迷进入所属场地时，必须遵守，尤其涉及形象方面，执得好紧。

小弟领过两次嘢。第一次为约同行到山光道会所打吡酒吧倾合作，之前从未去过，唔知规矩，只随意穿恤衫西裤，脚穿波鞋。一坐低，经理即埋嚟细细声讲：“曾先生，我哋借对鞋畀你好唔好？”意即指我对鞋唔合Dress Code，必须换，否则请离。当然换！经理送来一对欧洲名贵皮鞋，好舒服，着完几乎想问几钱，买咗佢。

另一次，有少少尴尬，某大董请到沙田董事厅观赏赛马。入到厢房坐底，又有黑色西装经理埋嚟话：“曾先生，有电话揾你，麻烦出大堂听听。”

　佢一边讲，主人家大董一边眼神调皮地笑。我心谂：“边鬼个知我嚟咗㖞，仲要打到去厢房，有乜咁大件事呀？”

一出厢房，经理已手持几条名贵领带：“董事房必须打领呔，请选一条。”

作为客人而不知规矩，皆因我大乡里是也。

今晚特别留意快活谷之星“饮杯”，换上田鸡排十档，分多两蚊，加上牌面潘顿只“晨曦俪人”会W，可惜唔知佢出软鞭定硬鞭？我决定饮返杯好过嘞。