【曾智华专栏】全球最重要的日子

今日乃地球上一个最重要的日子，因最高权力者将会诞生，正是美国总统。

不知大家感觉如何？小弟及一群长期观察国际政治者，见到两位候选人，皆感觉选唔落手。

首先当然是“随口噏当秘笈”的特朗普，话佢狂又得，话佢癫又得，竞选期间，信口开河乜都够胆承诺，例如话会赶走所有非法移民。住过美国者都会问：“得咩？点做？唔该讲埋政策落实方法！”

非法移民乃美国的老大历史问题，带来负面影响，但也带来经济发展的重大贡献，支撑起成个底层经济活动。

美国今天搞到刑事罪犯招摇过市可能成为总统，不知当地的知识分子如何吞得下。不过，你吞唔吞都好，全世界政治领袖都要谂定，佢一旦再掌权，如何过招。国际政治舞台，面一个，底又一个，可以非常残酷血腥。

至于贺锦丽，当然也有机会成为美国第一位女总统。但至今佢最大卖点，正是特朗普冇的笑容及亲和力量。在过去密集曝光的日子，大家睇唔睇到贺小姐有乜宏大发展蓝图（对美国以至对全世界）？近日尤其只是针对“狂特”冇逻辑的乱吠作回应，好似欠缺自己思维。事实，佢过往似乎亦冇乜重大贡献。当然你可以话佢掌咗权可能就会有表现，系唔系呢？

今次形势如此吃紧，唔排除又出现“死不认输”玩翻枱事件。幸而暂时特朗普并非在任，冇权调动用政府力量去赖死。

但令人十分担心，为美国是个“枪的国家”，多位在任及卸任总统皆曾受枪击，因好多不正常人会对自己讨厌的政治人物用暴力。

作为地球一分子，我只希望一切和平度过。