【曾智华专栏】报贩求生之道

唔使特别公布，大家都应知道今时今日报纸是如何艰苦地经营。小弟呢类真金白银每日买五份报纸睇的，肯定已属濒临绝种动物。

我的坚持，主要从Value For Money出发，因世界上根本冇乜商品，超值到好似报纸咁。

老友，如今你买面包或油炸鬼都10蚊起码，只得一团面粉。一份报纸呢，又系10蚊（《星岛日报》），由几百人日日夜夜艰苦制作，几十版内容，要乜有乜：新闻、娱乐、副刊、专栏、马经、财经……讲句俗啲，真系抵到呕！所以，我连埋网上订阅，每日睇足七份，大满足。

一个人叻到会飞都只识少少野，但几份报纸综合千人之力，提供的智慧、资讯及视野，绝对是极强的智慧维他命。

不少人放弃睇报纸，因政治立场唔啱自己口味。小弟又如何？根本一份报纸的政治版只占十分一，唔啱睇，抽起即掂，使乜因少少不同意见而放弃大量有用精彩内容。

最近识咗个报业分销老行专荣哥，倾谈之下，发觉今时今日报贩求生，绝对不能靠卖报纸，咁卖乜？原来最好赚为卖樽装水。

另外，香烟及玩具市场潜力也不可低估。早两年大型吹气黄鸭仔浮在维港，立即出现热潮，个个报摊卖鸭仔，单单尖沙咀某一档，已赚10万元计利润，是否惊人？

另外，旺角银行中心门口摊档也是指标。中秋一过，两种货品劲好卖，一为利是封，二为运程书，稍有知名度的风水专家书，全部销得。

仲有，你咪以为如今网上乜色情玩意有齐，冇人再睇咸书，原来唔系！对，销量少咗，但仍不俗，有趣在不同区卖不同品种，例如佐敦一带，最好卖是同志书。

有冇读者知道点解呢？