【曾智华专栏】歌星“偷听”牙医秘密

长者坐埋，其中一个经常性话题，必为牙齿。因个个咁上下年纪，十之七八牙齿出现问题——或牙根松动，或咬骨变崩，或蛀牙要补……总之，就系或乜或物。

其中之一乃不少老友记要种牙，大部分认为——早种早享受，既然人人都唔知仲有几长命，而始终都要种，咁就早啲种，食多几餐好味又舒服嘅。

如今种牙可平可贵，香港做，名医郁郁三万、四万元一只，普通亦二万几元。但若你飞过台湾，即变万五元，近近哋，深圳亦大把。

当然，对内地医疗水平有“看法”的，几大唔去。但事实上面医生真真多啲嚟密啲手，工多艺熟，万二、万三元已搞掂。小弟有位亲戚，返番禺做，只需八千几元。

一众倾倾吓，发现歌星K虽六十有七，但两排牙仍非常健壮，与年纪唔多脗合，于是问佢有乜秘诀保养。

“各位，我哋揾食靠把口，凡上镜，经常要被大近镜（Big Close Up）影住，如今啲摄影机全部高清，所以，你棚牙唔齐整或有污迹等，全部现形，大大影响形象。不少艺人歌手早早去韩国搞，成棚换晒。我的全部真野，当然要花心机保养啦。幸而三十年前一次偷听到牙医与护士对话，立即开窍。”

原来当日歌星K去洗牙，医生与护士边洗边闲谈，医生话畀护士听：“阿X，好彩唔系个个病人都识得用牙线及勤用漱口水咋，否则我哋分分钟冇得捞呀。”

意思系乜？即若个个病人认真保养牙齿，尤其勤用牙线清洁牙缝，再加漱口水消毒，如此，蛀牙率必大大减少。个个冇烂牙，冇蛀牙，冇牙周病……咁医生食乜？“偷听”完之后，阿K从此日夜用牙线及漱口水，就咁，六十几仍唔怕擘大口唱歌。