【曾智华专栏】应家栢，打劫呀

十次唔逢一闰，周三本栏贴士畀两只全中，百分百！不过……唉，惨被神秘势力打劫，搞到我由龙虾餐变两𩠌饭，真系MM声。

小弟贴士为“我做到”及“晨曦俪人”，前者隔夜开始由头热到开跑，冇乜蛊惑，非常正路。但“晨曦俪人”呢，呢只马一直次热，入闸前仍有五倍，开闸！有乜变化冇人知，电算机都唔知，但过咗终点即通天，变两倍！边只“神仙手”狂落飞？食咗三倍赔率咁？摆明夹硬打劫！

应家栢总裁，今日小弟击鼓鸣冤，唔该你责成保安部作地毡式调查，搞清神秘势力从何而来，是本港或是海外，与乜野人有连系，一定要公布，唔该！

另外，大家也可当娱乐片，睇睇当晚第一场潘顿如何施展软鞭大法，以大热身份甩掉第四位，又再“私人醒”竞赛小组一剂，当佢冇到。

小弟再三指出，“软硬鞭”与“伸缩文”眉来眼去，总之，你博我就缩。第一场“架势奇爸”博，立即有人游马河，四重彩都唔要。

我睇的网上直播台副主持好惊讶：“哗哗啦啦，咁都得？有冇搞错？”

正主持气定神闲：“第二个就会搞错，佢咁跑就非常正路，绝无搞错。”

娱乐性百分百！

明日开始有大赛，二级“沙田锦标”，过百分明星马排队亮相。不过咁，此乃让磅赛，高分马会否在这种场合搏尽，非常成疑，因奖金又奀又要让磅，当然宁愿保留实力跑一级平磅赛啦，你系练马师也必如此部署，除非是已见顶老马，执得一场得一场，怕玩唔长。

呢场马，排位前有显示，因只得四匹有确定骑师，包括：“永远美丽”、“表之银河”、“越骏欢欣”及“禅胜辉煌”。其他马真系“边个得闲边个骑”。我睇，冠军就在以上四匹之中也。