【曾智华专栏】吞“卜”失明肥伯按摩师

不太明白，点解台湾有咁多“盲人按摩”？只要一上网，例如台北，已有数百间，不少属集团式经营，这现象仿似全球独有。有冇边位高人，可以替小弟拆解这个疑团呢？

早期基于好奇，同时也想支持一下伤残人士自力更生，故求其选一间试试。一般收费为按脚半小时400台币，加十五分钟再加200台币；其他也有头肩颈及全身，一般讲，按脚收费最高。去完一次后，感觉良好，故此每次到台湾，无论东南中北，都会去盲人按摩，每次都是按脚。

上周又到台北，打风，处处关门，但便利店及盲人按摩则照开，如此有工作热诚，当然要去捧捧场。

住JR东日本大饭店，位在中山区，行五分钟正有一间“咏泉盲人按摩”。

推门入内，两位师傅，一肥一瘦，轮到瘦的上钟，冇问题，照做。

师傅问：“先生，做多久？”未知佢功力，为策安全，答：“三十分钟。”点解？若唔妥，无谓虐待自己也。

手势专业，按得舒服，三十分钟后，立即加多十五分钟，对方感谢微笑，除多赚外，当然因客人欣赏。

一日后，心思思又去，今次轮到肥师傅。既然上次咁满意，唔使犹豫，主动提出：“师傅，请做四十五分钟。”

大剂！竟然出现反差感觉。即系点？即系……肥师傅真系大安旨意，态度松散，涂搽完润肤膏之后，顶佢头球，全程只用单手按。我的表情当然极度不满，可惜佢乃失明人士，就算小弟对眼喷火，佢都睇唔到，全程懒懒闲单手按足四十五分钟，咁鬼吞卜就赚咗我600大元台币。钱唔系大问题，但佢副低级服务（有咩？）态度，实实在在离谱，我当然唔会同佢理论，因为蹝气，今次嗗声吞咗佢算。