ANSONBEAN隔空冧爆Jaime：唔知几时会唔见咗佢 突破偶像派禁忌高调拍拖唔怕“走粉”丨独家
23岁ANSONBEAN（陈毅燊）最近推出跟女友张天颖（Jaime）合写的新歌《ONE DANCE》兼同名大碟，讲到明歌词是对女友道歉兼示爱，作为偶像派的ANSONBEAN唔怕“走粉”，老实表示拍拖应该开心唔应该收收埋埋，坦言同女友关系好好，一齐工作一齐做Gym一齐练歌，更隔空放火山级闪光弹，“好难得遇到呢个人，唔知几时会唔见咗呢个人，我好珍惜。”Edan应该好羡慕。采访：杜杜 摄影：朱伟彦 发型:Milk Chan@Xenter Salon 化妆:Zoe Fan 服装:RICKYY WONG STUDIO 场地:FWD HOUSE 1881
ANSONBEAN决定揾Jaime写新歌，并非想晒恩爱，只因睇清自己不足，亦只有女友能完美“解读”他，“我想做R&B情歌，尝试自己写，写完觉得好难听，最后就问Jaime介唔介意同我写？”ANSONBEAN好老实，插自己写歌唔掂，“实在太难听，所以费事影响到大家。”又不时赞女友，“佢同我close啲，先咁有耐性同能力将我感受变成首歌，佢创作能力好强。”
被女友说话点醒
歌词内容来自ANSONBEAN写的一首英文demo，“讲个男仔觉得自己好后生，未玩够，唔想稳定拍拖，女朋友觉得佢唔认真就走，女仔走咗之后，个男仔先发现真系好钟意个女仔，好后悔，所以就写咗呢个demo去承诺个女仔，佢真系爱佢，希望个女仔会畀次机会佢。”呢个贪玩男就系ANSONBEAN，女朋友就是Jaime，“𠮶时我哋未开始，认识中，我觉得自己23岁，未谂住稳定拍拖，佢发觉我好唔认真，唔想继续了解。”人类就系咁奇怪，身边人走咗先识珍惜，好彩ANSONBEAN最后识觉悟，“遇到啱嘅人就要珍惜，话未玩够系个无穷无尽嘅欲望，呢个追求系无止境。”
虽然Jaime得27岁但好识谂，唔会嬲死ANSONBEAN，仲同佢讲经希望感化佢，ANSON好记得女朋友嘅说话，“一段关系如果系健康，应该系互相信任，然后一齐去建立更加好嘅嘢，令到大家成长进步。”最终他决定将示爱道歉歌内容搬落新歌《ONE DANCE》。问到Jaime收到歌时有何反应？他就笑谓：“佢有俾我诚意打动，唔系俾我嘅旋律囉，哈哈！佢冇表示难听，但佢冇赞我都feel到，哈哈！如果佢觉得好听，会话好嘢嚟㖞，你不如快啲出啦！佢听完纯粹讲首歌内容嘅嘢，我都知道难听㗎嘞！”
“豆粉”批准拍拖
Anson跟Jaime拍拖后首次合作，被女友爱猫搞到敏感喉咙痕的Anson就话沟通完全冇问题，“有分歧咪沟通囉，我哋岗位分得几清晰，我负责创意部份多啲，始终我想表达我嘅情绪，佢负责技巧上嘅嘢，呢方面我相信佢，因为佢经验多过我，基本上冇乜分歧。”他亦唔排除情侣档合作陆续有来，“我哋都钟意表演、音乐，一定有合作机会。”两人唔会挂住拍拖，工作会互畀意见，“譬如post嘢，几点po先最多人like呢？！记者访问时，啲问题唔识答点算，我哋都会倾，一齐做Gym、练歌、练舞，一齐进步。”
对于年初被网民拍到去中环嘉年华拍拖，随后大方认爱，Anson坦认未公开前两人已讨论过，恋情曝光点处理，“一开始我哋都冇特登收埋，所以先会俾人影到，拍拖最紧要开心，要收收埋埋好多避忌，大家都唔开心，享受唔到呢段关系。”恋爱脑的Anson继续爱字当头，23岁偶像派的爱情观非常浪漫，“爱情好讲缘份同要珍惜，好难得遇到呢个人，唔知几时会唔见咗呢个人，关系需要维系，一齐后都讨论过，我哋都系公众人物，使唔使避忌？”Anson由贪玩仔变承担男，既然真拍拖就觉得无谓讲大话，“我哋有谂过，俾人影到就影到囉！其实我可以点样答先？！话我哋系朋友，如果话朋友，对女仔唔公平，对男仔冇乜嘢，咁我哋又真系拍紧拖，所以冇乜所谓。”对于公开恋情他亦不担心会“走粉”，“我信佢哋会畀空间我，见到我开心时都会开心，暂时睇落都乐观，佢哋都好支持，畀空间我继续去拍拖。”
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
