【曾智华专栏】“四哥”厨功好得

四哥系边个？当然并非谢贤啦，而是一位资深潮州菜师傅兼老板。

好玩在若睇佢个真名，分分钟以为是位女性，名谢苑君。我之前唔识佢，之后必定不停揾佢。

话说半年前，有对在长沙湾开公司的姊妹花Rita及Polly，知小弟为食成性，不停想试新地方，故提议：“碌Sir，有冇试过梅花邨小馆？相当掂，就在我哋公司附近，故变成饭堂，此店走中级潮州菜路线，有机会帮衬吓啦。”

听完冇特别上心，结果上周又有一位任职理财顾问老友波波，因代理的香港年金推出30万元特惠计划后，哗，即时做到冇停手，猪笼入水，当然要请食饭庆祝，竟又系提议去梅花邨小馆。

咦，咁就要试吓喇。

菜单传来：潮州冻红蟹、卤水鹅肝拼盘、灌浆萝卜、原只胡椒猪肚汤加第一刀粉肠、花螺盐焗鸡、一帆风顺大鹰、客家焖猪肉、方鱼炒芥兰、咸鱼鸡粒炒饭、两面黄、反沙芋。

　老老实实，在长沙湾开店的，必定不会是一级名店，地区及客路问题也。

日子到，入门口见一大只先生，原来正是经理威哥，服务友善又熟练。全店爆满，今时今日市道看，已是信心显示，令小弟开始对出品有点期望。

先上红蟹，大大只，突然大厨四哥出现话：“碌Sir，下次食细只啲，更鲜更甜，改试冻濑尿虾仔也可。”

专家推介，信十足，下次跟！

之后转身返厨房，然后一味又一味精品上枱，全部质素最少中上至顶级。

卤水拼盘收晒货，难得有几片大墨鱼，鲜味浓郁具O赵头；花螺盐焗鸡点火上，玩野抢眼。

食到尾，死就死，最多翌日禁食，点解？因想来碗白果芋泥。油光闪闪，正！呢餐之后，肯定好快再揾四哥。