【曾智华专栏】“潮州精神”一定输

上周日赛马，有两件事“好好玩”。第一是黄宝妮成为最快开斋W出的女见习骑师，不过，大家可再三睇片，欣赏当日佢点胜出，真真“由头到尾都咁好味”！

　相信事前好多兄弟都“知”佢要/会Sure Win，故大家非常识做，一齐“睇风景”。尤其次热、三热两大师傅潘顿及田鸡，更发挥“唔知跑咗去边”的超级绝技。

不过，呢类赛事有人缩，当然有人“去”，边只？正是其他一级高手的冷门马也。布文正正表演从后杀上，睇准唔会破坏大局，然后啱啱输少少超级功力。呢场Q有近700元，二重彩1140元，肯定“皆大欢喜”啦，但普罗马迷冇份！

另一搞笑为小弟上周六在专栏正头正路贴“潮州精神”拖“神虎龙驹”、“健康愉快”。

结果脚中晒，但“潮州精神”去咗边？大家又可以睇片，欣赏高手巴度点输。资深马迷睇佢转弯已知死硬，因佢飞出外档大力推骑，摆明尽快用晒只马段力，好野吖！

其实早一晚老友“马王辉”已拉我讲：“碌Sir，你贴‘潮州精神’W，我就话佢瓜硬。不是只马唔够实力，而是……大佬呀，‘庆典杯’呀，你只潮州佬点可无大无细？识做啲，当然缩埋，畀‘中华盛景’去啦，咁就超级政治正确嘞，你咪咁儍以为赛马单跑实力呀！”

辉哥系咪阴谋论？无法证实，但跑出结果正是如此，小弟又上了一课。

今晚快活谷赛事，摆明今季争冠军练马师的希斯，空群而出，布阵7只，运都赢埋，除“建测英”抽九档外，其他全部六档或以内，只只有机W或P。

我会由第一场“乐天派”开始捧，场场要预埋佢旗下战马，记住，切勿忽略牌仔黄智弘的“雅典武士”及“冠宝驹”，两场皆有澳洲大师傅负责“遮荫”呀！