【曾智华专栏】潮菜高手孙淑强

揾食，小弟过去数十年，一直跟着“辉哥”吴锡辉，由1977年识佢开始，真系大开食界。佢虽然并非有钱仔，但唔知点解，就是生成条“公子命”，从来唔使做粗重嘢，食脑唔食力，天生领袖才能，大把人畀佢点（自愿！）兼生活质素好高档。

当中饮食尤其嘴尖，故我早年亦胆粗粗替佢起咗个绰号——尖嘴辉。

佢食得精，我则食得滥，夹埋就真系有晒化学作用，拍住食呀食，才知原来饮食学问非常浩瀚。

辉哥乃潮州人，故此，对潮州菜极之精通，可以讲横扫香港，全城优质潮州菜皆佢“射程范围”，与所有东主老友鬼鬼。事实，只要辉哥认为边间掂，𠮶间必定大把生意。无他，黐住辉哥的为食鬼人数极多，一个带十个，十个带一百个，立时生意多到你唔信。

上周又拉衫尾，辉哥带我去一间新开“旧”潮州店，在万宜大厦旁，名“尚盛”。

之前佢点醒小弟：“嗱，呢间是新店，但其实是旧店名‘尚兴’，由潮州巷发大而来。潮州菜老饕冇人唔识西环潮州巷，几十年前大量功力非凡厨师在呢条巷打出来。‘尚兴’招牌极响，熟客众多。而‘尚盛’正是‘尚兴’的变身，由潮州菜专家、厨功相当高强的孙淑强（Tony）揸Fit。”

辉哥话好的，边个敢挑战？是日十三条“为食敢死队”操去，辉哥果然有江湖地位，Tony亲自写菜兼招呼，拍心口全部招牌菜尽出，果然功力非比寻常。

讲都唔信，一共食咗十八道菜，食啊食，饮呀饮，讲呀讲，3小时殊声过。大家夹钱后，立即举手做民意调查，一致认为平均95分，有几味100分爆灯。

我又如何？认为盅潮州翅乃几十年来食过最顶级的，真是犀飞利！