【曾智华专栏】点解窒住唔出㗎？

今日小弟一边度标题，一边想笑，点解？因我辈男性老友，十个十个前列腺开始松弛，咁会点？正是经历“少年一支箭，老年一条线”的人体自然发展。

凡入洗手间，就算有尿意都会窒住窒住，未能一气呵成话出就出，一支箭般射出。

提起窒住窒住，足足成个8月，大量六十岁以上老友猛问：“喂碌Sir，搞乜咁耐都未出㗎？”

佢哋问乜？正是问过去几年大概此时，政府开始公布的申请银债详情。

今年《财政预算案》，财爷波叔早早讲咗会发行500亿元银债，自然老友记全部摩拳擦掌准备Sleep On It（瞓落去），因全世界冇一样毫无风险的投资，会有咁笋回报。

不过，小弟点会有答案呢？我又唔系财爷，更唔系金管局总裁余伟文，只有佢哋才知几时开记招、定利率及介绍详情。

等我乱鬼咁估啦，如今拖呀拖，窒住唔公布，乃是因系人都推测美国联储局9月减息。而银债定息率完全睇住美国息率而行，若定得太高而美国减息，以今时今日政府财政状况，孭多半厘已是天文数字支出，点顶？断估应该睇埋9月美国点郁手再算，如此，在财务安排上比较安全。

但讲真，各位老友记又毋须太紧张，因讲到底，以过去八期银债发行睇，次次认购都爆晒额。咁即系点？即系你瞓几十元至几百万元落去都冇意思，因太公分猪肉，人人一律只得咁多，最终分几手畀你，都系唔咸唔淡，冇大茶饭食。

只是，话虽如此，若你已六十岁，仍应该入纸认购，因此乃有如生果金及医疗券，纯属政府为长者而设的派福利行为，当然攞，作为自己对香港多年贡献的些微奖励。