【曾智华专栏】好食都唔返转头

今日标题有冇引起你好奇？出外觅食，你知我知，如今在香港，几难揾到一间真正好食餐馆，可以话十中无一。遇上，竟然唔返转头？

你一定会问：“系咪贵？系咪服务差？系咪装修气氛、冷气⋯⋯唔理想？”甚或你可能会问：“你强调洗手间要清洁及有私隐度，系咪唔得？”

以上全部答案——唔系！

咁答案系乜？正是——负责人（老板、经理或大厨），不适当程度的过分热情。呢吓实在太难顶，令成餐饭由我自己到带去的朋友皆极度不安及冇瘾，但又唔好意思开口，结果系⋯…咪再搞。

起因当然因小弟在传媒及饮食评论界有少少知名度，故此，当然特别多人希望我帮衬时有“愉快经验”。

可惜，并非位位食肆负责人都明白，令客人有“愉快经验”之道。结果，我遇过的：

一、老板味味菜都推门（我多数订房）入来亲身介绍菜式。老板通常为中年人，说话不少水花四溅，但又冇戴口罩习惯，于是⋯⋯在座客人纷纷你眼望我眼，老板更唔识Do，为每味菜食到中途时，佢又推门入来问意见，味道得唔得？（大佬，你可否食完成餐先问呢？）

二、间中有大股东见小弟带咗城中名人来，即频频借意先敬酒，后打卡，唔止佢，连门外的老婆亲戚朋友都涌埋入嚟。喂，大家好熟咩？

三、上周又有奇遇。名店经理见第一次认识，真真老实不客气，见我朋友带来名酒，竟冇问就倒一杯⋯⋯先饮为敬。更离晒大谱，佢未征求同意，就不单止灌一杯，而系⋯⋯每隔十五分钟就入来敬酒（当然用我哋的红酒），你话系咪MM咁嘅声。

以上三个情况，真人真事真经验，老友，你系我都从此拜拜啦。