【曾智华专栏】好嘅唔灵丑嘅灵

昨日提及特首《施政报告》正在征求民意，大家有乜意见，作为“热爱香港一市民”，想讲就快啲讲（不等于会被采纳）！

小弟从来对香港意见多多，但冇咁好气讲得晒，只是经常出出入入旅游，见到不少情况极不顺眼。

第一顶唔顺只“大白象”邮轮码头，根本浪费纳税人钱，日日在拍乌蝇，眼都冤。

呢个码头，当公布“煲呔”研究拍板由政府孭起时，我已多次在电台公开力陈万万不可。因公务员从来冇生意头脑，亦唔会积极揾钱，基本训练只为守章则，Never Think Out Of The Box，除“做又三十六，唔做又三十六”传统思维外，最怕畀人觉得“官商勾结”，过分表现想揾钱是原罪，知冇？

所以在商业世界中，明明是钻石的一切，落在公务员手上，必定变烂玻璃，冇晒价值。

举个实例，大家可记得领展上市前，屋邨商场几恶顶？又旧又烂，厕所塞晒。你投诉？分分钟十问九唔应，就算应完都系Hea吓你算，永远冇人装修、冇人翻新，只得个残样。

好嘅唔灵丑嘅灵，我所有当时的反对意见，可能网上仍有得翻听（啩？），中晒。

如今“大白象”既成事实，点搞？再靠杨润雄？咪讲笑喇。唯一解决方法系用机场及港铁模式，成立一个以商业原则营运的局去独立处理，政府咪再上身。

希望今次《施政报告》一锤定音！

另有一样湿碎的政策，想讲好耐，是坐高铁回港的戆居安排。

游完内地，用回乡证出境。回到香港，用身份证入境，查来查去已畀人麻烦多余之感，算嘞，最离谱，你过晒关，入咗香港，出高铁闸，竟再要排队“嘟”多次回乡证，为乜？

以今时今日的科技，坚持呢个政策者究竟有冇脑？