【曾智华专栏】内地觅食的疑惑

游顺德，当然四围食食食。一边食，一边脑内弹出不少疑问。例如点解唔见各式煎炸、豉油或焖鸡翼菜式？点解市场冇乜急冻肉类食品⋯⋯

终于有一日食到去某间名牌酒店中菜厅，发觉早茶点心甚正，刚刚见总经理Simon行过，捉住佢问，正因此君乃香港仔，好啱倾，故此知无不言，令我开窍。

“碌Sir，内地为保民生安定，故设有物价局控制物价。例如猪肉，为保猪农，故此入口急冻货税率特重。就咁，我哋当然只用生㓥本地猪。”

“咦，呢个用重税炼入口货做法，与美国一样㖞。不过，入口内地的急冻猪，雪到‘木’晒，就算与新鲜猪肉同价，都应瓜直啦。”

“另有样受欢迎食品，好多客人问我哋点解冇，唉⋯⋯又系因成本高囉！”Simon冇瘾话：“正是鸡翼！要做豉油鸡翼或炸鸡翼，想大只啲，只可用入口货。但为保护本土鸡农，外来鸡任何部分都贵得多，点搞？”

不过，Simon的厨师仍搞出一味威震顺德的鲍汁鸡脚，秘密是重本少少都用急冻巴西鸡脚，贪其肥大肉厚，骨胶原丰富。其他厨师用内地鸡脚，细细只，冇口感满满的效果，输一条街。

讲吓讲吓，我俩最有共鸣为觉得内地客专诚到香港食烧鹅，极端荒谬。

“大湾区大把烧鹅，新鲜㓥，够肥美，兼且可以用荔枝木真柴烧，皮脆肉厚又多汁，出炉即食，𠮶种美味，比对香港用冰鲜货，边度有得挥呀？难明点解咁多人儍吓儍吓去香港排队！”Simon的疑惑，我早早有。事实，我凡想叹走地靓鸡或新鲜烧鹅，必回顺德，因质素根本无得比也。

唯一解释，北方同胞比较乌卜卜，只靠网上旅游讯息，于是误会香港急冻烧鹅更正啩！