【曾智华专栏】“你揾我唔到”的新名店

老友H哥喜庆，开心召饭。佢老哥交游广阔，食尽香港，晚晚大吃大喝，冇乜边间“米记”（米芝莲）名店未试过。请食饭，当然唔会拣行货。

“碌Sir，今次去一间好难揾的新店！”

“老老实实，H哥，天时暑热，唔该咪揾间雷公都打唔到食肆呀，大佬，你就有司机啫，我畀网约车费都干塘㗎。”

“唔远，就在湾仔鹰君中心楼下，好就脚！”

时间到，飞的过到鹰君中心，约七时，仍热到汗流浃背。大宝号地址写G4，但揾呀揾，成座鹰君中心楼下兜咗两次都揾唔到，有冇搞错？撞呀撞，撞正同被邀的两位美女行政人员，也是湿到化妆都融埋。

最终闯入大堂问经理，佢木无表情答（可能畀人问咗N次）：“出门口转右，冇明显招牌，有道日式门，有细细个字‘Minato’，按电掣，门就自动开。”

哎吔吔，呢间Minato设计师真真大整蛊，家阵同客人玩捉迷藏咩。

终于入到去啦，由炎热天气转入冰冷大厅，反差极劲。咦，别有天地㖞，楼底高高，间嘢未听过，即新开啦，竟已坐咗八成客。

睇睇，哦⋯⋯原来食日本料理及铁板烧。

H哥宴客，当然唔会手软，应该几重锤吓。哈，点解能够一开就咁多客呢？唔系话香港饮食业如今“水深火热”嘅咩？

终于明啦，因见到揸Fit人Gary现身打招呼。何许人？正是鹰君集团旗下饮食部门总领导，长期管理米芝莲的“明阁”，熟客众多，当然一开就嚟捧场。睇环境，应属鹰君集团大老板罗嘉瑞最新“饭堂”啦。

好唔好食？边有得唔好吖，如此档次，出品及质素当然冇得输啦。

不过咁，我呢类普通消费能力小市民，最少中条孖T先可以嚟，否则一定畀人问点解“突然富贵”！