【曾智华专栏】无谓竞争带来退步

各位老友，你冇睇错，今日标题真真正正是：《无谓竞争带来退步》！

吓，唔系嘛，从来推诸四海皆准定理为“有竞争有进步”㗎㖞。

基本只啱一半，不少时候，就我见证，发觉竞争带来浪费，带来多余，带来麻烦，带来退步！

例如N年前的录影带，日本两大影音集团死都唔肯合作，系要自己发展独家模式，于是无无谓谓整出两种模式，一种为Beta，一种为VHS，有咗录影带之后，当然要出录影机，于是又多多余余变出两款。

最后当然两款皆Out晒，费时失事。

另一近年最明显攞消费者嚟搞的，为电子支付。基于乃大水塘，各大自私到爆的大集团死都唔合作，系要多多余余搞自己一套，希望食尽。就此搞出眼花缭乱方式，散晒。

小弟想代表消费者讲句，边有人喜欢同时用几种付款模式㗎？总之边种最方便用边种，一“嘟”就走得，唔使找钱，唔使签名，最重要唔使死记烂记N个密码。EPS一直无法流行，相信正因如此。

香港众多电子支付中，八达通赢几条街。一方面早著先鞭，所有交通系统采用，渗透率近百分百，兼且方便到震，一“嘟”走得。

我都试过用其他方式，烦到呕，又要开手机再揿Apps出嚟，又要预先登记，又可能要记密码，讲方便，根本同八达通冇得挥。

大约七、八年前，接受某个外判调查，问我想八达通点改善，小弟实牙实齿：“立即一卡走天涯，去到世界边个角落都一‘嘟’搞掂。如今科技昌明，只要各国及各集团放弃自私心态，齐心合作，冇理由唔得。如今揾消费者嚟搞啫。”

上周本报报道八达通积极拓展跨境支付。喂，讲咗N年喇，咪再得个讲字好唔好？