【曾智華專欄】無謂競爭帶來退步

各位老友，你冇睇錯，今日標題真真正正是：《無謂競爭帶來退步》！

吓，唔係嘛，從來推諸四海皆準定理為「有競爭有進步」㗎喎。

基本只啱一半，不少時候，就我見證，發覺競爭帶來浪費，帶來多餘，帶來麻煩，帶來退步！

例如N年前的錄影帶，日本兩大影音集團死都唔肯合作，係要自己發展獨家模式，於是無無謂謂整出兩種模式，一種為Beta，一種為VHS，有咗錄影帶之後，當然要出錄影機，於是又多多餘餘變出兩款。

最後當然兩款皆Out晒，費時失事。

另一近年最明顯攞消費者嚟搞的，為電子支付。基於乃大水塘，各大自私到爆的大集團死都唔合作，係要多多餘餘搞自己一套，希望食盡。就此搞出眼花繚亂方式，散晒。

小弟想代表消費者講句，邊有人喜歡同時用幾種付款模式㗎？總之邊種最方便用邊種，一「嘟」就走得，唔使找錢，唔使簽名，最重要唔使死記爛記N個密碼。EPS一直無法流行，相信正因如此。

香港眾多電子支付中，八達通贏幾條街。一方面早著先鞭，所有交通系統採用，滲透率近百分百，兼且方便到震，一「嘟」走得。

我都試過用其他方式，煩到嘔，又要開手機再撳Apps出嚟，又要預先登記，又可能要記密碼，講方便，根本同八達通冇得揮。

大約七、八年前，接受某個外判調查，問我想八達通點改善，小弟實牙實齒：「立即一卡走天涯，去到世界邊個角落都一『嘟』搞掂。如今科技昌明，只要各國及各集團放棄自私心態，齊心合作，冇理由唔得。如今搵消費者嚟搞啫。」

上周本報報道八達通積極拓展跨境支付。喂，講咗N年喇，咪再得個講字好唔好？