【曾智华专栏】老板百态（二）

昨日讲到香港大老板，千奇百怪乜都有，下属通常评语——好鬼恶顶。

正常吖，若非够辣够狠数口精，点会做到大老板？大富豪中有边个系纯情善男信女？

讲到大老板百态，今日再斩三両！

甲总裁：我老板著名孤寒算死草，虽则几十亿元身家，但仍乜都仙仙计仙仙炼（正常生意人本色也，所以总裁只可打死一世工）。大佬呀，千几万元年薪请我返嚟，成日追住问的，并非公司有边处新领域可以投资赚大钱，而系讲出冇瘾，不停问公司仍有边处可以悭、可以Cut，尤其强调废物利用，不准浪费水电，员工不得滥用公司资源（纸笔⋯⋯甚至厕纸），搞到我变细眉细眼管理，真冇瘾！”

乙执董：“我老板一样，香港人人识，传统大富豪，钱多到几代使唔完，但佢用每一分钱都死计烂计。佢最喜欢用钱来无踪去无迹，故此，使钱通常唔会有记录，基本唔碌信用卡，支票也少用，总之经常成身金牛。佢有铺习惯，久唔久，大约三几个月，就会静鸡鸡叫我入办公室，攞出个鸡皮纸袋，内有一百几十万元金牛，笑笑口话：‘你做得咁好，私人奖金，唔好话畀人知呀！’点解要畀现金？又系要冇记录啩？”

C老总：“我老板大性大情大开大埋，非常情绪化，好喜欢当面闹人，但闹完之后，第二朝会向你私下道歉。另有一弊，佢冇家室，晚上发闷时，又缠住你要求陪饮，两杯到肚苦水猛吐，冇晒日间的英明神武形象。其实香港不乏呢种‘日夜两面人’，老友管理豪华会所，话不少著名富豪皆如此。”

正常吖，大富豪也是人一个，自然有正常人性。总之，收人工打份工，同老板合则来，不合则去，两不相欠！