【曾智华专栏】老板百态（一）

自己知自己事，小弟从冇兴趣也不会与富豪交朋友，因圈子不同，价值观念不同，亦冇乜意欲打商界工。对，以前个个礼拜要访问各界顶尖人物，当然包括香港著名富豪，不过，访问完，缘份也即完，呢类大老板与我的圈子永不重叠。

高级打工仔或打工皇帝又唔同，可以交朋友。佢哋个个要受老板气（份丰厚人工早包括畀老板省又或出卖自尊），啱倾的话，我好愿意听佢哋呻老板啲古怪嘢。某晚又开坛。

A总裁：“老板请我时，年薪极劲，另加花红，高过所有挖角者。不过佢有一条件，必须二十四小时开手机，一Call即听，不得有误！起初以为佢随口噏，上任后先知嚟真！就算大家在世界不同城市、不同时区，佢根本唔理，二十四小时畀指示，二十四小时问公司嘢！”

B总裁：“我老板更恶顶，全天候工作狂，人生冇家庭，只有事业，日日搏大命，永远唔放假，所以，当你申请假期时，佢会𢲡晒口面问：‘做乜放假呀？’就算勉强批咗，当你摊喺泳池，以为可以松弛时，佢睬你都儍，照打长途问东问西，摆明唔记得又或唔理你系咪放紧假。”

C执董：“我老板好少少，每日畀返两个钟头私人时间我，因佢著名爱妻号（惧妻？），老婆大人规定晚晚要一齐撑枱脚，故老板凡应酬，只到酒会与主人家握握手就闪回家。不过，你咪以为佢收工，因陪完老婆，晚上十点又搏命！我经常凌晨收到佢Email，好彩只是间中有紧急的，否则早早搞到神经衰弱。”

以上三位打工皇帝，讲出好惨，不过，位位年薪几千万元计，加埋花红，你同我做成世都未必有咁丰厚收入，食咗咸鱼渴死都抵啦。