【曾智华专栏】谢谢推广“港铁运动场”

上周二本栏标题《狂风暴雨酷热运动场》，一半讲笑，一半讲真！因个人需要每日步行及拉筋四十分钟，以维持基本健康及身体柔软。只是近两周天气极度反常，早前日日倒水咁倒，之后日日酷热警告，热到人都
，咁点可以在室外做运动？

纯粹忽发奇想，试吓揸车泊土瓜湾表位，然后走落港铁站大堂，咦，非繁忙时间好正噃，冇乜人，有冷气，干净企理，行人通道又阔又直，来来回回走几次已达标（约三公里），于是在此写出来。

刊登前，老婆大人负责打稿，嘲笑：“你衰喇，咁写法，容乜易个个捐晒入去港铁站，又唔系搭车，只行来行去，港铁公司真系多得你唔少嘞！嬲你唔知，话你唔好意思。”

究竟会否真的如此？好易知啫，专栏出街后，我将佢传畀港铁老友，谂住博闹。

点知，哈哈哈，原来唔系，对方反应出乎意料之外，竟然多谢我。

喂喂，大家估唔估到点解呢？有冇人揸咗港铁股票，想知为乜要多谢小弟呢？

原到港铁公司收入众多，其中之二为收广告费及收租。

广告，易解释，接触得越多人，收费可以越贵。故此，若个个当港铁大堂为“运动场”，唔搭车都落去行吓，等于谷大人流，令广告接触面更大，理所当然，广告费可以收高啲。

另外，大家应知，港铁所有附属地方，无论是黐住的商场或站内大堂，皆有大量出租舖，你可知每间舖租金多少？冇人行拍乌蝇，当然难叫高租值。但若果日日人来人往，咁就唔同喇。港铁老友最精明：“碌Sir，你提倡大堂当运动场，最好个个行到又渴又饿，要买水买食物，咁就更正，我哋有得分成㗎！”