“Ada姐”吓亲唔敢再跟旧同学姜涛联络 女团VIVA口密拒讲情史Carina钟意黐女仔丨独家
英皇新女团VIVA，由《全民造星IV》参赛者姜咏鑫（Ada）、李晞彤（Carina），《就是青春》亚军张鈊贻（ValC）及来自顺德的马思惠（Macy）组成。 第2首派台歌《DTR》讲女追男，问到情史，4女都非常口密，而曾跟姜涛传绯闻的Ada，再次厘清两人关系。采访：杜杜 摄影：朱伟彦 形象: Constance Lee、Peli Lam、Kary Leung@Constyle发型:Ritz Lam、Jeremy Wong、Kelvin Liu、Taka Chung、Hiro Chow@myos_hair 化妆:Cyrus Lee Makeup Team、Irene Hung、Davina Cheung 场地:Studio Meta
继出道作《Topic Killa》后，VIVA再推出同样由韩国班底制作的派台歌《DTR》，讲女仔主动出击，霸气地去“Define the Relationship”（确定关系）。问到有冇试过女追男？Carina代队友表示并非她们作风，“我哋之前拍拖都属于观察型，多过主动出击型，亦偏向长情同认真对待感情。”
唔会主动追男仔
Macy首先交待情史，“我唔觉得恋爱好重要，又比较早入行，恋爱经验应该系冇。（即系冇拍过拖？）唔系冇拍过拖，可能有暧昧，唔系恋爱囉！冇认真计过几次，就算有段关系都唔觉得自己拍紧拖。”讲到女追男更加觉得冇可能，“我系非常之被动嘅人，好似今日比较少讲嘢。”
拍过2次拖的Carina，自觉同性缘较异性缘好，“自细读女校，对女仔好主动，会主动去认识，但唔系好识同男仔打开话匣子，比较怕丑啲，同场有异性，我会偏向黐住女仔，唔敢主动出击。”以私隐为由唔肯公开情史的ValC，自认性格比较主动，“见到好想识嘅人，无论男女都会主动做朋友，了解对方，但唔会话想同佢拍拖而想识佢。”
自认长情的Ada，拍拖次数不多，对上1次长达8年，同样被动的她，未试过做主动，“无论爱情、朋友、工作都好，比较被动，生活嘅嘢我未必会主动同佢哋（VIVA）讲，说话比较少，唔会主动同人讲对佢有意。”讲到参加《造星IV》时，跟同学仔姜涛因网上互动而传出绯闻，她对此感到无奈，“其实都系同学关系，真系唔存在绯闻，当时比赛先互相鼓励。”她承认之后跟姜涛冇任何接触，“大家都觉得距离要拉返远啲，因为咁冇再联络？！”
队员负责写Rap
《造星IV》60强止步的Carina，IG有5万followers，属队中人气王，多过VIVA官方IG follower，她表示全靠《造星》，“由2、3千去到20k，多谢𠮶时嘅自己有勇气去玩比赛。”她亦想到方法帮队友增加人气，“𠵱家IG可以一齐出po，见到只舞几好睇㖞，会叫佢哋一齐拍片。”
ValC前年夺得《就是青春》亚军后，接受本报访问时表示想向创作歌手发展，更视中学师兄汤令山为奋斗目标，以女团姿态出道的她，目标依然未变，“新歌《DTR》Rap都系自己写，好似向𠮶个方向行紧，学紧点写好曲同词。”曾任舞蹈员的她，亦期望将来帮手为团队编舞，“好多嘢都好想做，但实行要同公司继续倾，做咗dancer得2、3年，年资唔系太高，想揾个有经验嘅人一齐做，会完整啲，”
2019年Macy参加内地《花物女孩大赏》夺得“年度花物女孩”，因而签约英皇，是最早加入公司的成员。2020年参加腾讯视频女团选拔节目《创造营2020》并取得第24名，同年推出个人单曲《一时一样》。她认为女团更适合个人发展，又开心可以来港工作，“我住喺顺德其实好近，同埋以前都会嚟香港玩，唔会觉得离乡别井，同埋由细到大都睇TVB，接触香港文化，同妈咪一齐睇《超级无敌奖门人》系童年回忆。”
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
