【曾智华专栏】天价买水者儍儍哋？

二十多年前访问外科圣手，绰号“金刀梁”的梁智鸿医生，讲完正经嘢，佢话口干，跟住揸只杯，开水喉，装满水即“嗗碌嗗碌”饮光。

当时小弟睇到眼凸凸，因自幼开始，所有卫生书籍皆教市民将水煲滚才好饮，而眼前呢位医学界巨人，竟违反这理念。

佢见我擘大眼，知我谂紧乜，笑笑口话：“曾先生，香港水喉水好清洁㗎，根本唔使煲。我从来都系就咁饮，方便快捷，几十年如一日！”

当年佢六十岁，今天已经八十五岁，饮水喉水习惯绝无改变，唔似啲身娇肉贵者经常扬言：“只饮法国矿泉水！”

其实非法国水不饮者，有几多健康过，又或长寿过梁智鸿医生呢？

多少受佢影响，我亦从来唔饮“贵水”，要饮就饮最廉价普通过普通的樽装水。

小弟当然知作为一种商品，水可以畀到人一种虚荣感，由产地、包装、牌子、价钱，全部加埋加埋，搞到揸住支名牌水四围行就感觉好威，似1997年前揸份西报通街走一样。呢种心态冇乜唔正常，但以为咁就高人一等，自己呃自己。

消委会最新测试，将所有牌子饮用水，由三两蚊支到三几十蚊支全部化验，发觉根本冇乜唔同，贵的并不特别对身体有益；平的由解渴到一切效果，与几十蚊的一样。

咁讲，用几十蚊买贵水一族，咪有啲儍儍哋？

最近认识一位报摊专家，佢话：“碌Sir，你可知做报摊及便利店，最赚钱系乜？”

“香烟？避孕套？杯面？汽水啤酒？”我答。

“全部唔系，系水！一支水成本一个几毫，内里乜都冇，用胶樽载住就可卖几蚊，利润之深，劲犀利，冇乜人知㗎。”

老友，其实使乜吓吓买水吖，用个樽装煲过嘅水饮，效果一样啫。