【曾智华专栏】若果得，仲使几千蚊⋯…

人渐老，身体当然出现这样那样的变化。长者人人有分、永不落空的是筋骨问题，腰酸脚软软、坐骨神经痛、五十肩、腕管炎⋯⋯

另外，“日子有功”，手手脚脚甚至面部出现啡斑老癦。

以上的一切并非什么致命病，更不会太难顶，故此，一般人都不会立即去睇医生，因诊金次次千千声冇走鸡。

咁点？忍囉！除非真真顶唔顺，例如坐骨神经痛到冇觉好瞓，否则，挨得一日就一日。

呢呢，这就令好多“乜乜物物产品”应运而生。基于不是药物，故此不受监管，变相可以卖广告促销。于是网上布满可以帮你解决任何生理问题，例如脱发、肥胖、不举、便秘、神经痛⋯⋯甚至去斑的商品。部分重锤请明星做代言人：“嗱，好掂㗎，我都有用㗎！”

呢类商品定价往往只是三几百蚊（因太贵患者宁愿睇医生），刚刚引到消费者心谂：“反正平平哋，不如试吓，可能得呢！”

人同此心，心同此理，小弟也是普通人，也有这种心态，间中就禁不住买吓呢样、买吓𠮶样试试，三几百元，唔得就掉咗佢。

例如去年坐骨神经痛时，见到网上有只“乜乜痛”，扬言“一樽搞掂晒”，三百八十八蚊送上门。好，试试。食完一樽，零效果，终于死死气去揾骨科推拿圣手“真人发功”才搞掂。

上个月又中！因面上长期有几处啡斑，唔多好睇，哈，又喺网上见到广告话有只护肤霜“一樽搞掂”，令啡斑消失。好，又买樽试试。

同肥女儿讲，即畀佢窒：“肥爸，若三两百蚊樽膏有如此神奇效力，班靓太仲使花几千蚊去激光打斑？咁你都信？”

结果点？当然畀肥女儿一箸夹中，二百几蚊樽润肤膏，润肤当然冇问题，能去斑？发梦冇咁早！