【曾智华专栏】终极一战买硬吕健威

马季煞科，只得一个焦点，一个话题，正是谁会登上冠军练马师宝座。二选一，吕健威或伍鹏志？

假若冠军平头，就要计亚军，我睇吕健威一定过头嘞。

呢次决战，我仍会买威哥赢，因两人终极一战布局，伍厩似乎已去到山穷水尽，冇马可用，牌面只得“美丽第一”有机会W，另外“坚闯”只能博博吓，其他几匹完全冇冠军相。

吕厩又如何？摆明倾巢而出，用尽一兵一卒揾命博，当中有几匹可以问鼎冠军，包括：

一、“禅胜辉煌”。今季演出非常稳定，在不停进步中，由季初五十七分编入第四班开始，又W又Q，杀下五W两Q，真的是战绩辉煌，目前已升至第一班，九十七分，但未见停步。今次更刻意改配潘顿，目标超明显，两个字——要赢。唯一考虑，今季已跑咗十二场，能否顶埋呢铺？

二、“龙之辉”。千二米明星，今季出五场，三W一Q一第四，绝对专家。近两次赢，潘顿按缰过终点，分别大胜两个几及六个几马位，赔率只得一点四及一点五倍，显示根本冇得输。今次再跑千二米，热热都要食，兼且要食硬！

三、“包装天将”。上场新马插四班跑快活谷千二米，潘顿临尾一骑即弹离两个几马位赢，根本未知仍有几多在手。吕健威为争冠军，将马转跑沙田。上场W完评磅员加十分，即系⋯⋯有排赢呀！

四、“手机表霸”。又一明日之星，今季五十二分起步，出九场，三W三Q三P，准到飞起，布文霸住骑，今次又座P望Q或W，冇走鸡！

五、“遥遥领先”。潜质非凡，5月才开始上阵，出三次，两Q一P，下个目标肯定是W，今场应该到位！

吕厩五匹大恶马晒冷，问你伍鹏志点闯关！