【曾智华专栏】去到边写到边

上周小弟在专栏透露，到贵州旅行，因不少景点洗手间没有坐厕，故令团中揸枴杖老人家极度不便，唯有放弃唔上山，但一个人点搞？冇问题，反正我并不热衷身水身汗四围“欣赏美景”，好，留低在出发处作陪可也。

每次皆要呆坐最少个多小时，白挨浪费光阴？当然不会，易过借火，立时抽出稿纸及笔，好似车衣女工咁“渣渣声”写稿，总之去到边写到边。

经常有人问：“喂，碌Sir，乜你写极都唔干塘㗎？边来咁多灵感日日写？”

“冇得解释，天生嘅！”

以前几十年，凭多口，朝朝主持电台早晨节目也永不干塘，如今转跑道也如是，写呀写，源源不绝。

其实从事每个行业者皆有天分，学都学唔嚟。年轻人能早知自己天分及兴趣，尽力争取入行，必定出人头地。

昔日小弟管电台，年年考新DJ，试音及笔试合格后，就接受我面试。

面试纯考天分。简单，你把声靓到天跌落嚟，又或写嘢写到识飞，但交个咪畀你做广播，最重要乜？平时说话当然要求有内容、有趣味性，以吸引听众（这个可早准备），另更重要为执生爆肚！因直播途中，乜都可能发生，例如任何机件Down（坏）咗、访问中对手晕咗、拍档肚痛闪咗⋯⋯总之是突然要你斋讲十分八分钟，以等一切回复正常。

呢种急才急智绝对考天分。我也曾试过做电视直播时，嘉宾（李泽楷）未出现，要顶十五分钟，结果，如果唔识见到乜都讲一大餐，即死。

所以考DJ其中一项测试，畀对筷子或畀波佢：“请用自己想像力讲五分钟，唔准断，唔准停。”

过到关者即具基本天分，若再加声靓、学历好及专业态度，咁康庄大道就在前面。