【曾智华专栏】Tunnel Vision小井蛙

五十年前，千辛万苦（因经济能力极薄弱）筹钱走去美国留学，因倾慕当地的一切自由风气，实在非常向往。更有幸能入读传理系，此学系强调推动至高无尚的言论自由，校园之内噏乜都得，过瘾。

点解谂起这段日子？因发觉近几年小弟凡表示自己每日睇七份报纸时，总有人以轻藐态度留言：“乜今时今日仲有人睇报纸嘅咩（但佢睇的，正是我的专栏）？”

恍如唔睇报纸就代表潮、代表型！系真唔系真？不过，这令我重温半世纪前，在俄勒冈州大学内，被教授当众喷的一次刻骨铭心教训。

上课第一日，佢抽起我问：“Luke，你在香港，睇边份报纸的？”当时我懒醒，只讲三份知识分子报及一份西报，以为咁就好有卡士。

点知佢兜口兜面质过嚟：“点解你唔睇北京立场及台湾立场报纸？你咁偏睇，有乜资格读传理系？英语有云：Tunnel Vision（视野狭隘），以及你哋中国人有句老话：A Frog In The Well（井底蛙），正正代表你的睇事角度及心态。”

省完一轮之后，佢要求每个学生，每日不准只睇某一个台（例如FOX、CNN、BBC或CBC），以免自己陷入某一方面的喉舌思维。

美国的好处，是大家可以公开反政府，当年校园高潮，当然是反战——反越战及韩战。

经过几年美国大学教育，在港也从事几十年传媒，工作与兴趣融合，小弟每日必睇匀各种立场报纸、各个电视台（本地及国际，尤其西方以外的必须参考，包括中央台、Russia Today及卡塔尔电视台）。当然，全部背后都有利益团体操控，宣扬权力来源讯息及意念。

睇匀后，再用独立思考及客观分析作判断，如此才不会变只Tunnel Vision的小井蛙。