专栏｜攻守均衡 狂牛劲过黑鹰

西班牙先对克罗地亚再对意大利，俾人感觉犹有余劲，其实西班牙真系三线都好平均，由以往嘅地上最强，变成有长有短，尤其系两翼非常之恐怖。

想讲下两翼尼高拉斯威廉斯同拉明耶马，每一下抛开拉扯，然之后再突破，对任何人都系产生好大威胁，左边尼高拉斯威廉斯，经常利用古古列拿嘅Underlap，尤其系对意大利𠮶下中楣波真系令人印象深刻，如果入咗真系世界波。拉明耶马俾我嘅感觉真系唔似一个第一次参加大赛嘅球员，𠮶种胆识再过人突破远射好犀利。点解佢哋两个有咁好嘅发挥呢？一定系靠个黄金中场，法比安彭拿受到洛迪卡斯简迪同柏迪保护之后，可以喺中间发挥，交咗好多靓嘅直线，佢喺中间做𠮶个串连好大作用。

估唔到呢队西班牙真系咁犀利，两对强队都可以话完胜，而家唯一担心嘅就系后备同正选嘅差距好似有啲大，当洛迪卡斯简迪同艾华路莫拉达都好似有少少伤嘅情况下，佢哋又可以点样变动，但如果完全无问题嘅情况，相信呢队西班牙真系好大机会攞欧国杯。Willhappy