【曾智华专栏】揾人唔知“米价”

童年时经常听见长辈窒人或骂人：“你呀，正一食米唔知米价！”

从来冇人真真正正解释小弟知这句话的含意，但我也畀人闹得多，开始意会其比喻，正是：每天吃米饭，却不知道米的价钱。用来形容一个人对周遭事物完全不了解，非常无知。

今日突然谂起呢句，因为⋯⋯先唔讲自己，讲讲睇到一个过瘾访问，主角为八十五岁的作曲及演唱巨星Neil Sedaka，向记者展示其新装修的豪华大宅。

年纪老，当然唔会再住House，未烦过咩。于是买下几间豪华单位打通，大到飞起，露台景观一望无际，用来享受人生最后一段快乐日子。访问尾段，记者问Neil：“仲有冇兴趣作曲呢？”

其实若你真的认识佢，应知所有Neil Sedaka的经典金曲，皆是在上世纪五十、六十年代作下的，例如：《One Way Ticket》、《Breaking Up Is Hard To Do》、《Oh Carol》、《Happy Birthday Sweet Sixteen》、《Laughter In The Rain》⋯⋯单单食呢堆歌的版税，已肯定几世无忧。再者，任何创作者的灵感，高潮期多只在二十多三十岁，通常四十岁就完结。所以，就算Neil再作曲，相信也难以流行。

不过，以佢声名，若表示有兴趣作曲，必仍大把人肯畀钱。访问到此，佢突然笑笑口讲：“最近阿女畀张支票我睇，话有人邀请作曲，支票银码为四千六百美元。我一睇，话畀阿女听，呢丁友好似填少咗个零㖞！”

事实，我亦经常遇上揾人唔知“米价”者，从冇做好资料蒐集，就乌卜卜出价邀请。喂，你堂堂大集团，每年盈利十亿百亿计，如此“肥到著唔到袜”，请嘉宾演讲，好意思扮穷，要求我收NGO车马费？系咪儍咗？

呢类人，送首《Lemon Tree》畀佢先：“Lemon tree, very pretty...but the fruit of poor lemon is impossible to eat.”抵佢哋日日食柠檬也。