【曾智华专栏】最受欢迎骑师——冇

今季冠军练马师斗得灿烂，伍鹏志早早大幅领先，几个月前本来蔡约翰有机会追近，点知佢跑跑吓好似唔多想玩，越堕越后，以“走地盘”计，小弟认为吕健威会过头。

套用跑法，一只马全程狂放，原本赢十几个马位，但入直路有另一只如飞杀上，越追越近，最后五十米经已平头。论气势，当然后上马着数，睇住你嚟食，且看中否。

至于冠军骑师，讲都嘥气，因早由“软硬鞭”玩晒，大胜几条街，无敌是最寂寞，如此打横行失晒平衡，马会高层点睇？

好嘞，另一个比冠军名衔更重要的“最受欢迎骑师”又如何？此乃真真正正马迷心目中的冠军，民意诚心支持也。

今年何泽尧肯定冇机会嘞，“田鸡”如何？骑功未够，差少少。“伸缩文”布文又如何？近月开始在阵上伸伸缩缩，点会最受欢迎呀？

计我话，今年应该取消颁奖！一如诺贝尔奖及香港杰出青年衔，冇就冇，咪夹硬揾个二打六顶！

不过，若可以选非长驻骑师的话，咁就有，一定系麦道朗当选，根本冇得挥，单睇佢面上股正气已经赢晒，唔使解释。再者，以其现今世界顶级骑功，早早通过“浪漫勇士”俘虏每位香港马迷的心了。

今天黄昏马，主攻研究第六场第三班千二米草地。

擂台趸当然是“龙之辉”，上次轻风送爽，收缰胜两个几马位，兵不血刃，结果被重手加十分！点解赢咁尽？唔多明。今次又必热到冇味，但一定要跟，吕健威在搏命也。

呢场买大热Q嘥气，不如飞起二三热，然后一拖七。我会特别留意“富贵驹”这匹爱尔兰马，在海外出一次即W，速速运港。贺贤早早卜定巴度执缰，且看会否一鸣惊人嘞！