【曾智华专栏】唔好向我讲对唔住

上周日“浪漫勇士”横扫日本，将安田纪念赛冠军摘下，冲线一刻，马迷必定无比兴奋（其实任何香港人也应如此）。无他，过去二十年能令香港人感到骄傲，可以挺起胸膛向全世界宣称“我好掂”的人、事、物，冇乜几多㗎。故此，今铺有点“吐一口乌气”之感，希望政府懂得食住个势，大事宣扬一番。

呢场赛事，小弟颇多观察，颇堪一记：

一、男人最光芒一刻。肯定练马师沈集成兴奋到爆炸，因佢真真正正由底层挨到今日顶峰，故此，肉紧地拖埋老婆上颁奖台，当佢高举双手庆祝时，老婆大人默默用引以为傲的眼神望住老公，甜到漏！

二、沈集成接受访问，不忘道谢逝世恩师爱伦，当年佢出任副练，正是被爱伦一丝不苟的坚持所感染，其中深深长记的一句，正是：“唔好同我讲对唔住！”

呢句，小弟昔日上司也是口头训令：“你坐得呢个位，有权有责将一切专业地完成，我唔想听你解释，切勿成日讲对唔住，专业世界内，冇人想知你点解失败！”

系咪当头棒喝？到小弟主管一个台时，也是经常有年轻同事失场、迟到、虾碌⋯⋯然后，成条死鱼咁话：“碌Sir，对唔住！”

若你一次、两次、三次接受，咁你就成个团队变“对唔住大队”，散晒！

今晚研究两场三班千二米。

第八场买“爱马善”，第一，感情分，要为弱家郑俊伟打气，希望佢及时上岸。大佬，努力一生，若临退休才被钉牌，真系好难接受。“爱马善”今季斗志惊人，出十一次五Q两P，但仍未能出头。今场我瞓身替佢打气！

第九场我捧“欢乐至宝”，吕健威正在冲冠，不会手软，此马上季两出快活谷千二全W，今晚再亮剑！